Под мотото „Слобода, правда и еднаквост” се одржува протест кој почна на плоштадот „Скендербег” во Скопје , а крајна дестинација е планирано да биде Канцеларијата на ЕУ во Скопје. Протестот е инициран од братот на Реџаил Ќерими, кој почина во затворот Идризово на 27 јануари.
Учесниците на протестот велат дека бараат меѓународна истрага за неколку судски случаи во кои се осудени, според нив, невини Албанци.
Тие планираат маршот да го продолжат до Канцеларијата на ЕУ во Скопје каде што ќе поднесат барање за меѓународна истрага на неколку судски процеси кои завршија со пресуда, како што е и случајот „Алфа”, во кој се предудени три доживотно затворски казни и една на девет години.
Меѓу осудените на доживотна затворска казна беше и Реџаил Ќерими.
Според учесниците на протестот, осудените се невини и сметаат дека станува збор за политички монтиран процес, а дека вистинските виновници за убивањето на еден полицаец Албанец, припадник на полициските „алфи” и ранувањето на двајца негови колеги Македонци, се на слобода.