Група активисти преку социјалната мрежа Фејсбук организираат протест за следниот петок, 25 август, против изградбата на панорамското тркало. Протестот е закажан за 18 часот на Кејот на Вардар до Музејот на македонската борба, каде што моментално се гради Панорамското тркало.
Организаторите на настанот велат дека сакаат да им порачаат на надлежните лица и институции во градот дека „Скопје не е Дизниленд и ова лудило мора да престане“.
„Продолжуваат да се градат контроверзни зданија и споменици без соодветна јавна дебата и консултација со жителите на овој град. Ние не сакаме нашите поколенијата да отплаќаат долгови со непоимливи камати за оваа естетска и политичка катастрофа. На Скопје му треба модерна инфраструктура и прогресивни идеи за развој на економијата и соживот. Придружете ни се на граѓанско собрание за да започнеме разговор за излез од овој као-антички, квази-барок, скопско-дизни кошмар“, пишува во објаснувањето на настанот објавен на „Фејсбук“.
Организаторите велат дека за да покажат како се чувствуваат во врска со спомениците и градбите во главниот град, на протестот ќе дојдат маскирани како Индијанци, ликови од филмовите на Дизни, кловнови и слично.
Панорамското тркало се гради помеѓу Камениот мост и мостот „Гоце Делчев“ во центарот на Скопје. Неговата изградба ги револтираше дел од граѓаните, кои преку социјалните мрежи побараа да се стопира изградбата, а средствата и механизацијата да се пренаменат за луѓето од поплавените подрачја.
За изведба на Панорамското тркало, дел од проектот „Скопје 2014“ се издвоија финансиски средства во висина од 18,3 милиони евра.
Објектот ќе има дијаметар од 57 метри, при што истиот ќе се издигне 73 метри над брегот на реката Вардар. На тркалото ќе бидат поставени 30 кабини во форма на гондоли со носивост од 750 килограми. Како придружни објекти ќе бидат изградени кафетерија, сувенирница и ресторан. Рокот за изведба е пет години.