Во врска со злоупотребата на историјата со која владата на Република Бугарија се заканува да го блокира почетокот на преговорите меѓу Брисел и Скопје во процесот на евроинтеграција на Северна Македонија, група историчари од пост-југословенските земји, кои оваа година го иницираа потпишувањето на Декларацијата „Да ја браниме историјата“, испратија протестно писмо, што го НОВА Ви го пренесува во целост:
Конфликтите околу историјата и историските симболи повторно се политичка тема во Југоисточна Европа. Во последните месеци, бугарската влада се закани дека ќе ги блокира разговорите меѓу Брисел и Скопје, барајќи од Северна Македонија да ја прифати „историската вистина“ дека македонскиот идентитет и јазик имаат бугарски корени и дека македонската нација е создадена од Тито и Коминтерната.
Врз основа на изразените ставови во Декларацијата „Да ја одбраниме историјата“, ние, потписниците на ова писмо, го изразуваме нашиот протест и осуда за овој случај на историски ревизионизам и злоупотреба на историјата за политички цели. Ние веруваме дека ваквиот пристап е опасен не само за историјата како хуманистичка дисциплина, туку и за демократијата и просперитетот на регионот, но исто така и на самата Европска унија. Наметнувањето „историски вистини“ е неприфатливо и опасно. Создавањето на македонската нација не се разликува од начинот на кој се создадени сите други нации, а правото на самоопределување е основно човеково право.
Затоа бараме историчарите во Северна Македонија и Бугарија, но и во сите земји во регионот да бидат професионални и да се спротивставуваат на злоупотреби на нивната научна дисциплина. Бараме од политичарите да водат одговорна политика, да не поддржуваат историчари што ги разгоруваат националистичките конфликти и да не вршат притисоци што доведуваат до фалсификување на минатото. Ги замолуваме европските институции и држави да реагираат на злоупотребите на историјата, почитувајќи ги основните принципи на Европската унија што се загрозени на Балканот и во Европа овие денови, како што се различноста, антифашизмот и демократијата. Европската унија е создадена како лек против лошите искуства од минатото и затоа не смееме да дозволиме искривувањата на историјата да ги уништат принципите врз кои се темели идејата за обединета Европа.
Ние, потписниците на ова писмо, им даваме поддршка на интелектуалците и историчарите во Северна Македонија и Бугарија кои отворено се спротивставуваат на политичките притисоци и се борат за заштита на својата професија и професионалните стандарди. Само солидарно можеме да ги надминеме сериозните пречки што стојат пред нас!
Проф. д-р Дубравка Стојановиќ, Универзитет во Белград
Проф. д-р Хусија Камберовиќ, Универзитет во Сараево
Проф. д-р Твртко Јаковима, Универзитет во Загреб
Проф. д-р Бошо Репе, Универзитет во Љубљана
Доц. д-р Аднан Прекиќ, Универзитет во Црна Гора
Д-р Сњежана Корен, Универзитет во Загреб
Д-р Миливој Беглин, универзитет во Белград
Проф. д-р Дамир Агишиќ, Универзитет во Загреб
Доц. д-р Бранимир Јанковиќ, Универзитет во Загреб
Проф. Д-р Момир Самарџиќ, Универзитет во Нови Сад
Д-р Олга Манојловиќ Пинтар, Институт за неодамнешна историја на Србија, Белград
Д-р Срѓан Милошевиќ, историчар, Белград
Д-р Александар Р. Милетиќ, историчар, Институт за неодамнешна историја на Србија, Центар за историски студии и дијалог, Белград
Веjко Станиќ, историчар, Белград
Петар Шарковиќ, историчар, Белград