„Срам!“ Ова е зборот кој стотици демонстранти едногласно го скандираа пред просториите на Студентскиот Парламент вечерва. Професори, родители, роднини и останати граѓани, денеска на мирен собир пред Студентскиот Парламент изразија поддршка на Студентскиот Пленум, кој и ден по одржувањето на скандалозните избори за студентски лидер не престанува со бојкотот и алармирањето за фалсификувани избори.
Студентите денеска пред СПУКМ првенствено и се обратија на полицијата за вчерашната прекоумерна употреба на сила врз нив, со цел гласачките кутии да се внесат во просториите на Студентскиот Парламент. Бараа полициските сужбеници да понесат одговорност, а Ректоратот на УКИМ веднаш да ги осуди изборите и да ги исклучи од своите органи и тела студентските претставници избрани од Студентскиот Парламент.
-Вашата униформа значи обврска да ги штитите граѓаните на Република Македонија. Вашата униформа значи да ги спроведувате Уставот и законите, вашата униформа значи дека при пријава на кражба на фалсификувани избори, не треба да ги тепате тие кои ги пријавиле. Имавте должност да ги заштитите граѓаните на Република Македонија, не да ги тепате нејзините деца, рече студентката Ивана Туфегџиќ во обраќање до полицијата.
Таа побара студентите да добијат записник за вчерашната акција и образложение кој наредил да се тепаат студентите.
Пленумци се револтирани и на односот на дел од професорската фела, за која велат дека останала „нема“ на вчерашните случувања.
-После се она што се случи тука, немате повеќе лице на УКИМ, не сте пожелни професори кои се продадовте за безпари, оставка! Им порача на професорите студентот Исмет Шабановиќ.
По час и половина протест пред СПУКМ, каде на прозорците завршија неколку фрлени јајца, студентите одлучија протестот да го продолжат на Универзитетот „Кирил и Методиј“.
Движејќи се низ Центарот на Скопје тие изразуваа негодување за експресната реакција на полицијата која ги обезбедуваше со обична полиција објектите на Собранието и Министерството за надворешни, а со специјални единици и штабот на ВМРО-ДПМНЕ од страната на Рекорд каде што и помина колоната демонстранти.
Движејќи се кон УКИМ, студентите ја потсетуваа полицијата која ги следеше за уставната автономост која е загарантирана на Универзитетот. Кога демонстрантите влегоа во дворот на УКИМ, полицијата остана надвор, по што се скандираше „Автономија“.
-Ова е време кога не смееме повеќе да се криеме позади ништо. Досега можевме да ги свиткаме кичмите, но од денеска сметам дека сите, особено професорите треба да кажат дека се на страната на правото, на демократијата и на страната на легалните избори на Студентскиот Парламент. Се надевам дека сите ќе собереме храброст да ја сочуваме автономијата на единствениот најстар Универзитет, рече професорката Синоличка Трпкова на платотото пред УКИМ.
Студентите најавија собир пред Ректоратот на УКИМ во 8 часот во понеделник, за кога е закажана вонредна седница на Ректорската управа. Тие очекуваат сите професори, членови на универзитетскиот Сенат едногласно да ги осудат изборите и да побараат одговорност од Студентскиот парламент.