Стотина новинари денеска на протест пред Кривичниот суд во Скопје повторно побараа слобода за нивниот притворен колега Томислав Кежаровски. Ова е втор протест на новинарите пред кривичниот суд, а доаѓа еден ден по одлуката на Кривичниот совет да го продолжи притворот на новинарот за нови 30 дена, со што тој останува трет месец зад решетките во Шутка.
Протестот започна со повик на претседателката на Самостојниот синдикат на новинари и медиумски работници Тамара Чаусидис која побара едноминутно молчење за мртвата слобода.
„Мислам дека поради ова што сега се случува со Кежаровски, се што ни се случува во последните месеци, време да се соочиме со реалноста – слободата на изразување е мртва; мртва е како што професионално се мртви некои колеги кои работат во контролирани медиуми и, за жал, и физички е мртва како што се мртви некои нејзини поборници“, рече Тамара Чаусидис.
>>Критики за притворот на Кежаровски и од европските новинари
Претседателот на Здружението на новинар Насер Селмани ги повика на разум судиите кои ја потпишаа одлуката за притвор на Кежаровски
>>ФОТО: Графити пред Собранието „Слобода за Кежаровски“
„Тука сме да повикаме на разум ако уште остана разум во оваа институција. Оваа одлука е дрска, затоа што сакаат од новинарите да напрацат монструми. Тие судии што вчера ова го потпишаа знаат дека нашиот колега нема да избега, и многу добро знаат дека тој нема таква материјална состојба да бега и да живее надвор од државата. Одлуката покажува дека слободата на изразувањето е во милост и немилост од арбитрарните одлуки на судот“, изјави Селмани.
>>ОБСЕ со критики за продолжувањето на притворот за Кежаровски
Новинарите го повикаа колегата Кежаровски да го прекине штрајкот со глад, кој трае веќе четврти ден. Главниот уредник во весникот „Нова Македонија„ Зоран Димитровски му порача да го чува своето здравје, но ги повика и Претседателот, премиерот и министрите да стават крај на како што го нарече „кадиско-спахискиот и султански систем на органите на правдата“.