Утре, со почеток во 11 часот пред Собранието на Република Македонија ќе се одржи протест против предлог- законот за прекин на бременостa, кој по скратена постапка влезе во собраниска процедура.
Протестот е организиран од страна на организацијата за здравствена едукација и истражување Х.Е.Р.А., преку нивниот Фејсбук профил.
Предлог-законот за прекин на бременост, кој по скратена постапка влезе во собраниска процедура, предвидува дека прекин на бременоста нема да може да се изврши ако од прекинување на претходната бременост не поминала една година, освен во следниве случаи: доколку бременоста претставува опасност за животот или пак би довела до тешко нарушување на здравјето на жената за време на бременоста, породувањето или по породувањето.
Сепак, втор абортус во иста година ќе биде можен и во следниве случаи: ако се утврди дека детето ќе се роди со тешки телесни или душевни недостатоци или кога до зачнувањето дошло со извршување кривично дело како силување, обљуба врз немоќно лице, полов напад врз дете, обљуба со злоупотреба на положбата или родосквернавење, како и кога ќе се утврди дека во текот на бременоста или по породувањето би можела жената да дојде во тешки, лични семејни, материјални или други услови што ќе имаат одраз врз нејзиното здравје.
Ако жената сака да ја прекине бременоста по 10-тата недела, ќе мора да има одобрение и од првостепена комисија за прекинување на бременоста.
Оваа, како и второстепена комисија за прекинување на бременоста, ја формира министерот за здравство за секоја здравствената установа во која се врши абортус.