Платформата за граѓанска политика „Ајде” денеска напладне треба да оддржи голем протестен марш против неуставните закони за хонорарците со кои, како што велат, се прекршуваат неколку уставни права и се врши грабеж на граѓаните.
Маршот ќе почне пред Министерството за финансии, а ќе заврши пред Уставниот суд на Република Македонија, каде ќе биде поднесена претставка од 7 илјади граѓани за утврдување на неуставноста на пакетот закони со кои се регулира плаќањето придонеси за хонорарците.
Во текот на март и април годинава, „Ајде!” спроведе граѓанска инцијатива во 15 градови низ државата, со која им овозможи на илјадници граѓани да се приклучат кон здружената акција и да го изразат револтот од пакетот закони.
Од „Ајде“ велат дека покрај нарушеното владеење на правото, со овие закони се ускратува правото на плата, пауза, годишен одмор, породилно/родителско отсуство и синдикално здружување, а хонорарците остануваат заглавени во бирократските лавиринти, затоа што законите се непрецизни, двосмислени и нејасни, заради што администрацијата не знае како да ги спроведе.