Под мотото „Струмица и Струмичко против рудникот на смртта“ денеска во Струмица се одржа протестен марш против отворањето на рудникот за бакар и злато „Иловица-Штука“.
Учесниците на маршот рекоа дека нема да дозволат отворање на рудник бидејќи тоа ќе влијае на нарушување на целокупната еко рамнотежа во Струмичкиот регион.
– Се собравме денес да го искажаме нашиот револт пртив отворањето на овој рудник. Нема да дозволиме да се отвори рудник, рече Мите Белмезов, учесник на протестот. Костадин Ристоманов од Здружението „Здрава Котлина“, организатор на протестниот марш, изјави дека се тука за да ја охрабрат Владата да донесе одлука за раскинување на договорот со концесионерот.
– Јас се надевам дека Владата ќе постапи како што очекуваат сите граѓани, рече Ристоманов.
Протестниот марш, кој се одвиваше по улиците на Струмица, заврши пред седиштето на концесионерот на Рудникот „Иловица-Штука“, компанијата Еуромакс ресоурсис“. По завршувањето на протестниот марш со реакција се огласија од компанијата „Еуромакс ресоурсис“. Оттаму велат дека Рудникот за бакар и злато е целосно безбеден за животната средина и здравјето на граѓаните и е пример за одговорно и модерно рударство.
„Еурмакс ресоурсис“ одговорно тврди дека рудникот за бакар и злато во Иловица-Штука ќе се развива согласно највисоките стандарди за животната средина, согласно законите во Република Македонија и највисоките меѓународни принципи. Додаваат дека нивните реномирани акционери, меѓу кои и Европската банка за обнова и развој како најголем поединечен акционер, бараат запазување на дополнителни критериуми за заштита на животната средина и над барањата на домашното законодавство.
– Имајќи ја предвид загриженоста на заедницата, одлучивме да не користиме цијанид во постапката, иако оваа постапка е целосно безбедна, а нема да се користи ни сулфурна киселина. Ќе користиме само процес на флотација, кој веќе се користи во Македонија и е целосно безбеден процес, дополнуваат од „Еуромакс ресоурсис“.