Граѓаните и активистите кои пет дена протестираа против полициската бруталност, вечерва одлучија да го прескокнат протестот бидејќи е прогласен ден на жалост, во чест на загинатите полицајци во судирите во Куманово, јавува репортерот на НОВА Влатко Чаловски.
Тие вечерва во 18 часот се собраа во Градскиот парк, кај Школка каде во форма на Пленум разменуваат мислења на кој начин понатаму да продолжат протестите.
На овој собир присутни се претставници на Студентскиот Пленум, Хелсиншкиот комитет , движењето Солидарност и други организации за човекови права и граѓани кои с револтирани од политичката состојба во земјата.
Според некои од говорниците кои се обратија на овој Собир, протестите не треба да запрат, туку можело да се одржи мирен протест на кој на поинаков начин може да се изрази сочувство на загинатите.
Некои предлагаа палење свеќи, други се за црна лента или носење на црна облека. Останува ставот дека протестите се насочени кон барањето за оставки на државниот врв.
Граѓаните и активистите на денешниот собир отфрлаат политички етикети и определеност. Во моментот се уште се разговара дали треба да се има единствена порака која ќе обединува сите, а ќе допре до политичарите кои ја водат државата.
Во Градскиот парк забележливо е мало присуство на полицијата, а во околината на Владата и понатаму има големо полициско обезбедување.