Излезете министре и понесете одговорност. Едното дете ми го земавте друго чека на потпис за лекување! Со овие зборови мајката на Тамара, Жаклина Димовска му с е обрати на министерот Никола Тодоров во моментот кога колоната од илјадници граѓани застана пред Министерството за здравство. Таа беше на чело на колоната граѓани кои беа дојдени на мирниот протести и заеднички побараа оставка од министерот Тодоров и сите инволвирани во смртта на Тамара. Колоната од граѓани застана пред министеровгото каде и со едно минутно молчење и одаде почит на Тамара.
Потоа од звучниците се слушнаа симулации од кои се слушаше ритамот на отчукување на срцето. Во очите на многу граѓани граѓани, новинари, студентите можеше да се забележат солзи во очите.
„Да не излезеше со твојата скандалозна изјава дека вие како Министерство за здравство ќе ги покриете сите трошоци за лекувањето на Тамара, досега таа ќе беше излечена со помош на хуманите луѓе, му порача мајката на Тамара, Жаклина Димовска, на министерот за здравство Никола Тодоров.
– Каде ја испративте? На вечно почивалиште – рече во својот емотивен говор мајката Жаклина.
Граѓаните извикуваа „Убијци“ , „Сите сме Тамара“ „Нема правда нема мир“„Одете си“. Во рацете држеа транспаренти „ Само монтруми калкулираат со човечки животи“, „За вакво здравство не плаќаме“, „Ја убивте Тамара“, „Парите ги трошите за бронза и мртви идоли“
Вработените од министерството за здравство протестот го гледаат од прозорците, а немаше празен прозорец ниту во спротивната зграда каде што се сместени Институтите. Пред Министерството за здравство имаше засилено полициско обезбедување.
„Вие сте виновни, вие и вашите комисии. Вие ја потпишавте смртната пресуда за Тамара“, рече мајката Жаклина. По ова граѓаните почнаа да го пеат омилениот рефрен од песната на Тамара „ Ангел си ти“ од Тоше Проевски. Потоа ги спуштија трнаспарентите на земја и ги фрлија црвените картони за Тодоров.
Претходно, протестот под мотото „Црвен картон за министерот Тодоров”, тргна од пред зградата на скопскиот Фондот за здравство, со барање за оставки на директорите Маја Парнаџиева Змејкова и Џемали Мехази, како одговорни поради не навремено реагирање за испраќање на Тамара на лекување во странство. Таму учесниците во протестот ја разбраа веста дека Парнаџиева Змејкова поднела оставка.
Граѓаните повикуваа на оставки и на лекарите во комисиите кои решавале за барањето на родителите на девојчето, а во рацете држеа црвени картони.
Говор одржа новинарот Огнен Јаневски кој беше директно вклучен во собирање на донации за лекување на Тамара, а кои беа прекинати бидејќи министерот вети дека лично ќе се заложи за нејзино лекување.
Од оваа локација протестниот марш тргна кон државниот Фонд здравство каде говор одржа Здравко Савевски кој рече дека Македонија има најслабо здравство во Европа. Колоната од граѓани кои се движеа кон министерството за здравство извлекоа солзи од очите на многу граѓани по улиците на Скопје.