-За некои мали чекори потребна е голема сила. Ако постои голема љубов за малите чекори, тогаш нема пат кој не може да се изоди, вели наставничката Снежана Алексиќ Станојловиќ, која вчера првпат предаваше македонски јазик во ОУ „Велко Влаховиќ“ во Нови Сад, Србија.
Наставничката м-р Снежана Алексиќ-Станојловиќ, инаку и писателка, која организира едукативно-креативни работилници за деца, гостувања и афрмација на македонските книжевници и ликовни уметници, остварува пријателска соработка со ОУ „Кирил и Методиј“ во с.Кучевиште кај Скопје, реализира часови по српски јазик во Македонија и часови по македонски јазик во Србија, воспоставува стручна соработка и разменува искуства од „добрата пракса“ со просветниот кадар во Македонија.
Ова е првпат во Нови Сад, во едно училиште да постои група ученици кои официјално учат предмет Македонски јазик со елементи на националната култура. Групата ја сочинуваат 18 ученици на возраст од осум до десет години, а меѓу нив само неколку имаат македонско потекло.
За секое дете беше обезбеден по еден примерок од списанието за деца „Ѕуница“, како подарок за првиот час по македонски јазик од Националниот совет на Македонците во Р. Србија.
Наставата ќе се реализира еднаш неделно како блок од два часа. На крајот од првиот блок час, одржан на седумнаесетти јануари, учениците порачаа: „Македонија се носи во срцето“.
*Вест и фото: Филип Димкоски