Негативен е тестот на новороденчето на родилката од Куманово која е заболена со коронавирус и се лекува на Инфективната клиника, потврдија за НОВА од Клиниката за гинекологија. Психијатриската болница во Демир Хисар остана без медициски персонал откако лекар- психијатар се заразил со КОВИД -19, сите се во изолација, се ангажираат лекари од други болници
Лекар-психијатар од Психијатриската болница во Демир Хисар е позитивен на коронавирсур. Сите лекари се ставени во изолација, а во болницата е направена реорганизација. До завршување на самоизолацијата на вработените ќе се ангажираат други доктори од Битола и Прилеп, а по потреба ќе бидат вклучени и психијатри од Охрид, Кичево, Гостивар и Тетово. Се затвора и Центарот за ментално здравје во Прилеп кој управува со болницата во Демир Хисар, информира министерот за здравство Венко Филипче.
„Станува збор за психијатар кој е асимптоматски, а имал позитивен случај на коронавирус во семејството. Тестот е позитивен, а со оглед дека бил во контакт со колегите во болницата, преку Центарот за јавно здравје во Прилеп направени се епидемиолошки анкети и е дадена препорака за самоизолација на психијатрите. Доколу се испостави дека психијатарот доаѓал со симптоми на работа , ДСЗИ ќе изврши вонреден надзор и ќе се превземат мерки како во претходниот случај со Кожна клиника“, изјави министерот Филипче.
Според него, во работењето на психијатриската болница во Демир Хисар ќе помагаат и лекарите од Клиниката за психијатрија во Скопје по системот на телемедицина.
Во Геријатрија во Ѓорче Петров каде што се наоѓаат најризичната категорија стари луѓе забранет е прием на нови лица и се преземаат мерки за нивна заштита, рече Филипче.
Тој најави дека сите 50 лица кои се покажале позитивни на КОВИД-19 во Систина ќе мора задолжително да направат тестови и во Институтот за јавно здравје. Денес ќе бидат контактирани сите лица, а според заменик министерот за здравство Арменд Арслани истите тестови кои што се прават во Систина ќе се изработуваат и во ИЈЗ.
Став на Комисијата за заразни болести по препораки на СЗО е дека тестовите кои се прават во Систина се само сомнеж дека имало болест и затоа секој што направил тест во оваа болница, задолжително мора да се тестира уште еднаш со тест за дијагностика во ИЈЗ, беше кажано на прес конференцијата.
„Во моментот на Инфективна клиника хоспитализирани се 64 пациенти, нови 6 се примени во последните 24 часа. Некои од нив кои што се чувстуваат добро ќе бидата тестирани за да се види дали се излекувани, како и 11 лица кои биле на домашно лекување во Дебар“, рече Филипче.
Нови 30 случаи се позитивни на КОВИД- 19, во изминатите 24 часа , со што вкупната бројка на дијагностицирани изнесува 384 лица, информираат од Министерството за здравство. Новите случаи се: Скопје-12, Куманово – 8, Прилеп – 9 и Крива Паланка-1.
Отворена е нова веб- страница во врска со новиот коронавирус, каде се собрани сите податоци за Ковид-19, koronavirus.gov.mk , рече Филипче.
„Совети во однос на заштитата, насоки како да се препознаат симптомите, секојдневните вести кои ги споделуваме на прес-конференции, како вести што се споделуваат од министерството. Овие содржини ќе се следат и на соц ијалните медиуми и на мобилната апликација којшто ќе може да се преземе- нагласи Филипче.
Тој потенцира дека во моментот имаме направено најголем број на тестови по број на жители, пред нас е само Словенија од регионот, што е добар сигнал. Одобрен е пристап и до Европскиот солидарен фонд преку кој државата може да добива помош во време кога е многу тешко да се дојде до потребните медицински материјали. Холандија исто така донарала кабинет за дијагностика и 2000 тестови преку Меѓународната агенција за атомска енергија во Виена, со помош и на амбасадата на Германија.
Во оваа ситуација на пандемија со коронавирус кога се затворија границите многу пациенти кои набавуваа лекови од соседните земји останаа без неопходната терапија. Таков е случајот со лицата со автоимуни заболувања кои го користат антималарикот „Плекенил“ што досега го купувале во Грција.
„За конкретниот лек изнаоѓаме решение со Клиниката за реуматологија, најдовме и некоја количина на залиха. Но, секој економски оператор кој може и сака да направи набавка на лек ќе му биде овозможено тоа“ изјави Филипче.
Тој повторно нагласи дека засега нема потреба од засилување на мерките, дека вирусот се движи линеарно, а пик се очекува да достигне на крајот на месец април.