Бугарскиот претседател Румен Радев денеска ќе му го врачи вториот мандат за формирање влада на кандидатот за премиер, предложен од втората по големина пратеничка група во Народно собрание – ГЕРБ-СДС.
Од партијата на Бојко Борисов веќе неколку пати најавија дека мандатот ќе биде вратен веднаш по неговото предавање.
„Добивме покана за утре, четврток, во 11 часот, за испорака на втор мандат за составување на влада. Нашата пратеничка група одлучи дека нема да даде кандидат за премиер и веднаш ќе го врати мандатот“, изјави вчера претседателката на пратеничката група на ГЕРБ-СДС, Десислава Атанасова. „Ќе учествуваме во консултации кога ќе ги закаже претседателот“, рече и Атанасова.
Шефот на државата во вторникот најави дека доколку втората по големина пратеничка група го врати мандатот, ќе ги повика сите парламентарни партии на консултации. Нивната цел ќе биде да разговараат за формулата за излез од кризата, какви се ставовите на партиите за можни коалиции и можности да побараат парламентарна поддршка за формирање влада во овој парламент, како и кои се приоритетите и програмите на политичките сили.
Врз основа на одржаните консултации, претседателот ќе одлучи на која политичка сила да и го додели третиот мандат.
„Доколку изборот на партиите се повторно предвремени избори, сметам дека е целисходно да се одржат на почетокот на октомври, за да може новиот парламент да има легитимитет преку зголемено учество на граѓаните“, прецизираше во вторник претседателот. (Р.Н.)