По средбите на Заев и Шеќеринска со Филе во Брисел, во домашната јавност претставници на владеачките структруи истапија со критика на сметка на СДСМ за тоа дека оваа опозициска партија истапила во Брисел со предлог за решавање на спорот. На овие коментари преку својот ФБ профил се огласи Радмила Шеќеринска. Во продолжение ја пренесуваме интегрално содржината на најзината реакција.
СДСМ, ниту било која друга партија, освен владејачката не учествува во преговорите околу разрешувањето на спорот со Грција. Согласно тоа, ниту можеме, ниту треба да лицитираме со предлози кои влијаат на процесот. За жал во Македонија, единствените луѓе кои знаат што се преговара на тема на овој чуствителна спор се само оние кои работат на Илинденска, тоа е Премиерот и тоа се луѓето околу него.
И навистина е смешно да се види луѓето кои преговараат и го држат целиот процес комплетно затворен за македонската јавност (ниту вие, ниту јас, ниту македонските граѓани знаат за што се дебатира и кој е македонскиот став) и сега тие да ни држат лекции дека некој друг позади нивен грб преговара. Тоа е апсолутна лага. Апсолутно е неточно дека влеговме во било кој детал од преговарачкиот процес. Затоа што едноставно ниту тоа го очекува Европската Комисија, ниту тоа можеме да го направиме.
Во Македонија не слушнавме ниту збор кажан од првите луѓе во власта за тоа до каде е преговарачкиот процес. Ако во Македонија власта продолжи да продуцира лоши вести, како што тоа го прави изминатава цела година, ниту еден супер комесар нема да може да ни го спаси членството во ЕУ. И тоа ние не можеме како опозиција да го бараме и очекуваме од Филе или било кој друг. Меѓутоа, факт е дека не ни треба ЕУ да дигне раце од Македонија.
Напротив, ние лобиравме ЕУ повеќе да се ангажира и повеќе да и помогне на нашата држава. Мислам дека тоа ја нервира власта. Бидејќи власта очигледно сака и Македонија да ја втера во ќор сокак и во изолација. И затоа сакаат и опозицијата да функционира во изолација. Затоа се нервозни, затоа што ние ја одбиваме таквата политика.