Законот за градење се донесе без архитектите. Никогаш не сме консултирани или инволвирани, професијата не се почитува, а ниту волјата на граѓаните и компетентноста на професионалците, вели во реакција за НОВА, претседателката на Асоцијацијата на архитекти на Македонија, Сања Раѓеновиќ Јовановиќ откако неодамна директорот на ГТЦ најави дека без законско попречување, Градскиот трговски центар ќе почне да се реконструира на лето.
Според наведените информации, изведбениот проект според идејното решение на авторите Жарко Чаушевски и Филип Богатинов се подготвува, а за неколку месеци ќе се распише и тендер за избор на изведувач.
На бројните опонирања за „облекување“ на ГТЦ во барок стил, покрај граѓаните кои потпишуваа петиции во јуни минатата година, и ААМ организираше низа настани под мотото „Го сакам ГТЦ“, каде што волјата на народот беше да се зачува Градскиот трговски центар во сегашната негова форма.
Поддршка за пораките од граѓаните даде и градоначалникот Жерновски кој и самиот присуствуваше на настаните, а според неговата изјава дадена во октомври, рече дека нема да издаде градежна дозвола за доградување и менување на фасадата на ГТЦ. Минатата година Советот на општина Центар не ги изгласа измените на Деталните урбанистички планови во општината, меѓу кои беше и ДУП-от Мал Ринг.
>> Павловска: Измените во Законот за градење го узурпираат правото на граѓанинот
Но според изменувањата и дополнувањата на Законот за градење и тоа може да се смени.
– Дефинитивно не се почитува петицијата, страшно е што не се почитува волјата на граѓаните, но уште пострашно е што не се почитува знаењето на професионалците, не се почитува компетентноста, вели Раѓеновиќ-Јовановиќ.
Според неа, со одлуката советите на општините да одлучуваат за доградба, надградба и реконструкции на објекти во закон влегува законско непочитување на професионалноста, надополнувајќи дека Асоцијацијата на архитекти поднела барање до Комората на овластени архитекти и инжинери да застане во нивна одбрана и да го спречи законот.
За последните случувања со изменувањата на Законот за градење и најавите дека објектот во главниот град од лето влегува во делот на барокни објекти, таа ги опиша како „тоа е исто да за дијагнози за болните одлучува еден совет на општина а не лекари“.