По вчерашното малтретирање со патувањето заради маглата кое траеше речиси 18 часа, македонските ракометари доцна по полноќ пристигнаа во Хернинг, каде се играат натпреварите од првата фаза во А група.
Домаќинот и актуелен европски првак Данска е првиот противник на селекцијата на Македонија во дуелот кој ќе се игра вечер од 20:30.
Во првиот натпревар од оваа група од 18 часот ќе играат Австрија и Чешка.
Македонската репрезентација најави дека цел и е пласман во вториот круг, а за остварување на целта избраниците на селекторот Ивица Обрван не смеат да бидат последно пласирани во оваа конкуренција.
Данска важи за фаворит за златниот медал, додека на Македонија и е потребна минимум една победа во дуелите против Чешка во вторник (од 18:15 часот) или Австрија во последното 3. коло (четврток од 18:15 часот).
Македонија беше петта на претходното Европско првенство во Србија 2012 година.
Покрај двата натпревари од групата А, на првиот ден на шампионатот во Алборг ќе се играат и првите средби во Б групата, а двојките се, Исланд – Норвешка (16 часот) и Шпанија – Унгарија (18:15 часот).
Во останатите две групи ќе играат:
Ц група: Србија, Франција, Полска и Русија.
Д група: Хрватска, Шведска, Белорусија и Црна Гора.