Собраниската расправа за предлог-буџетот за 2015 не започна во матичната комисија. Наместо во комисијата за финансирање и буџет, првите забелешки за тоа за што ќе се трошат парите од државната каса ги дадоа членовите на комисијата за култура, соопштува Телма.
Буџетот за културата за догодина е поголем и тежи околу 59 милиони евра. Повеќе од 1 мил и 500 илјади евра ќе отидат за универзитетот на Плаошник, ќе има пари за археолошките локалитети, но и за културните центри во странство и за поддршка на таленти.
Расправата се одржа без опозиција во комисијата.
Следната година се најавува конечно завршување на зградата на филхармонијата. Објектот кој почна да се гради пред останатите од проектот Скопје 2014 ги проби сите рокови за завршување на градежните работи. Се очекува со најавените нови 3 милиони евра од буџетот за 2015 година тој конечно да биде пуштен во употреба пренесува Телма.
Инаку, предлог-буџетот е проектиран на раст од 4 отсто на БДП, инфлација на ниско ниво од 2 отсто и буџетски дефицит кој е понизок од годинашниот и изнесува 3,5 отсто.
Вкупните приходи за следната година се проектирани за 5 отсто повисоки од оваа и ќе изнесуваат 163 милијарди и 280 милиони денари, додека расходите се повисоки за 4 проценти и ќе изнесуваат 181 милијарда 777 милиони денари.