Комисијата за заразни болести денеска не препорача нови мерки за заштита од ковид-19, иако се зголемува бројот на заразени, a продолжуваат да важат постојните 4 мерки. Новина е што во скопските поликлиники при Здравствениот дом – Скопје од понеделник се отварат 5 нови ковид-амбуланти и тоа во „Јане Сандански“, „Идадија“, „Ѓорче Петров“, „Ченто“ и во поликлиниката „Чаир“.
Др Злате Мехмедовиќ, портпарол на Комисијата, на прес-конференција истакна дека доминантен сој кај 85 отсто од заразените е БА.5 Омикрон.
– Знаеме дека ширењето на вирусот е високо, очекуваме висок број позитивни сличаи, но не очекуваме заразените да се со клиничка слика во форма за хоспитализација. Сегашните мерки остануваат на сила, доволни се постојните 4, се уште сме во зелената зона. Епидемиолошката состојба, согласно сите параметри коишто ги имаме – бројот на хоспитализирани, бројот на слободни болнички кревети и бројот на починати, се уште не става во зелената зона. Согласно ова, нема да има нови превентивни мерки препорани од Комисијата, нагласи д-р Мехмедовиќ.
Тој додаде дека е надминат проблемот со недоволниот број тестови за ковид, а појасни дека зголемениот број на случаи на граѓани со стомачни проблеми, како повраќање и дијареја, не е поврзан со ковид-19.
– Можеби најдобар начин да се дознае колку има заболени е да се прават независни истражувања во популацијата, нагласи д-р Мехмедовиќ.
(Љ.Б.)