Освен податоците за трошењата на парите на граѓаните во медиумски кампањи, во списокот „државни тајни“ по се изгледа влегува и борбата против корупцијата. Министерството за правда одбило да ја им достави информацијата за тоа како тече процесот на самооценка за спроведување на Конвенцијата на ОН против Корупција во земјава на Транспарентност Интернешнл – Македонија правдајќи се дека излегувањето на оваа информација во јавноста ќе предизвика штета по угледот на земјата дома и надвор.
Невладината организација поднела жалба до Комисијата за заштита на правото на слободен пристап до информации, но и од таму биле одбиени. Имено,комисијата се сложила со ставот на министерството за правда дека обелоденувањето на оваа информација навистина ќе и нанесе штета на земјата.
Од Транспарентност Интернешнл се жалат дека оваа навидум банална информација без проблеми ја побарале и добиле дури и нивните руски колеги од руските институции. Најголемата забелешка е на адреса на комисијата која ја обвинуваат за аминување на нетранспарентноста на институциите.
-Дополнително Комисијата дава легитимитет на забраната за било какво коментирање или доведување во прашање на антикорупциските активности на власта: „Активностите и мерките што се превземаат во однос на борбата против корупцијата несмеат во домашната и меѓунардната јавност да бидат доведени во прашање, бидејќи тоа би можело да влијае врз севкупната оценка за нашата земја во напорите за ЕУ и НАТО интеграција и етаблирањето на Република Македонија како држава во која се почитуваат законите и владеењето на правото.“ (цитат од Решението).
-Без да прејудуцираме било каква подоцнежна одлука на надлежен орган Транспаренси Интернешнел Македонија смета дека со ова решение Комисијата се претвора во сопствен антипод, односно во Комисија која забранува транспарентност и пристап до официјални информации кои се од значење за граѓаните), објаснуваат од Транспарентност Интернешнл во својата реакција.
Процесот на самооценка на земјата за спроведување на Конвенцијата на ОН против Корупција започна во Мај, 2012 година, а требаше да заврши до крајот на истата година. Овој процес требаше да отвори можност за отворање на поширок национален дијалог за антикорупциските политики и програми и стимулирање на реформи за спречување на корупција. Во него треба да се вклучени претставници на институции, антикорупциската комисија, невладниот сектор и приватниот сектор. Засега нема информации ниту до каде е процесот, ниту пак кој се е вклучен во него. Транспарентност Интернешнл – Македонија барале одговор на прашањата до каде се стигнати, каква е методологијата и кои невладини организации се вклучени.
На стартот на процесот претставниците на ООН во земјава велеа дека со тоа што РМ се согласила да ја имплементира методологијата за самооценка, земјата се обврзала да постигне повисоки стандарди. Во пракса, ова значи дека земјата сигнализира политичка волја и отвореност како и обврска да создаде поголеми можности за вклучување на граѓанското општество и градење на доверба.
Ова не е прв пат информациите од јавен карактер да се третираат како државни тајни со намера да не стигнат до јавноста. Парите потрошени од страна на владата за рекламирање, документи за загадувачите во земјава, договорот со концесионерот на аеородроми ТАВ и слично, не се даваат во јавноста и се третираат како класифицирани информации.