Министерството за култура на Република Македонија донело решение да ја разреши Маја Чанаќевиќ од функцијата директор на Националната установа Македонска филхармонија – Скопје. За вршител на должноста директор во оваа установа е назначен Виктор Илиески, член на ансамблот на Филхармонијата.
Од Министерството велат дека дел од причините за разрешувањето на директорката кои биле утврдени од инспекциските служби се дека таа не го усогласила работењето согласно законските одредби и Статутот на установата.
„Директорката на Филхармонијата нема донесено годишна програма за работа на установата за 2016 г. и за 2017 година. Таа делела гратис билети над бројот утврден со Одлуката на УО, при што за свечениот концерт за отворање на новата концертна сала директорката поделила дури 636 гратис билети (од вкупно 960 билети), без прецизна евиденција кому се доделени билетите. За двајца вработени музичари кои според евиденцијата подолг временски период не доаѓале на работа, директорката не презела мерки согласно со Закон и Статут, при што на едниот од нив, за вршење на работни задачи кои не се во описот на неговото работно место, покрај платата, дополнително му исплатила 550.683 денари (бруто). Чанаќевиќ не изготвила решенија за распоредување на вработените на работни места согласно новите акти за систематизација и внатрешна организација на работните места. Трошоците за мобилен телефон и биле над одобрениот максимум, не спровела Директорката не спровела постапката за реаудиција и Филхармонијата нема воведено електронски систем за евиденција на работното време на вработените“, пишува во соопштението на Министерството за култура.
Од таму додаваат дека во најбрз можен рок ќе биде предложена измена на Законот за државни службеници со цел да се деблокираат институциите и да се обезбеди трансфер на власта. По ова, тие најавија дека ќе распишат конкурс и ќе спроведат постапки за избор и именување на нови директори на националните установи.