Реакциите од израелските и палестинските претставници, како и другите светски лидери, за смртта на поранешниот Премиер на Израел се различни.
„Израел се поклонува пред поранешниот премиер Ариел Шерон“, се вели во соопштението на премиерот Бенџамин Нетанјаху, кој изрази „длабока тага“ за веста за смртта на Шерон. „Неговото сеќавање засекогаш ќе остане во срцето на нашата нација“.
Од палестинскиот претседател, Махмуд Абас нема коментар, но официјален претставник од партијата на Абас изјави дека токму Шерон е виновен за смртта на поранешниот лидер на Палестина, Јасер Арафат.
Претседателот на САД пак, Барак Обама, изрази сочуство до фамилијата на Шерон. „Им се придружуваме на Израелците во нивната жалост и почит“.
Францускиот претседател Франсоа Оланд, го нарече Ариел Шерон „една од најголемите фигури во историјата на неговата земја“.
– По долга воена и политичка кариера, тој се одлучи да влезе во дијалог со Палестина, ги нудам моите најдлабоки сочуства до неговата фамилија и народот на Израел, рече Оланд.
Во Велика Британија, премиерот Дејвид Камерон изјави: „Ариел Шерон е еден од најзначајните личности во израелската историја и како Премиер беше храбар во потрагата по мирот…Израел денес загуби важен лидер“.
И генералниот секретар на ОН, Бан Ки Мун изрази жал за смртта на поранешниот Премиер на Израел.
„Премиерот Шерон ќе биде запаметен по неговата политичка храброст и одлучност да се носи со болните и историски одлуки да ги извади израелските војници од појасот Газа. Неговите наследници се соочуваат со тежок предизвик да ги спроведат идеите за мир помеѓу Израелците и Палестинците“, се вели во соопштението на ОН.
Карл Билт, министерот за надворешни работи на Шведска на Твитер напиша: „Ариел Шерон беше голем лидер на Израел. Брилијантен командант, но исто така мудар да ја види потребата за мир“.
Поранешниот Премиер на Израел, почина денеска на 85-годишна возраст откако беше во кома од 2006 година.