По интервјуто на специјалната јавна обвинителка Катица Јанева објавено од страна на Јавниот сервис, а по кое следуваа реакции за објавениот дел кој протекол од телевизијата, немонтираниот, Првиот програмски сервис на МТВ ѝ се извини на јавноста, Специјалното јавно обвинителство и на обвинителката Катица Јанева, за ситуацијата.
Оттаму потенцираа дека согласно правилниците за работа во јавниот сервис, за сите направени прекршоци ќе биде поведена дисциплинска постапка, со цел утврдување на одговорноста.
Оттаму ги отфрлија сите обвинувања и напади за режирано интервју, со нарачани прашања, оградувајќи се од сите инсинуации, подметнувања и толкувања.
По ова следуваше реакција потпишана од Колегиумот на МТВ, во кој се вели дека случувањата и настаните поврзани со интервјуто на специјалната јавна обвинителка во Дневниците на МТВ1 и настаните кои следствено се случуваа потоа со протекување на снимката ги карактеризираат како неуспешен обид да се даде нова професионална слика на Јавниот сервис преку вештачко билдање на програма.
– Иако одговорниот уредник, пред една недела беше известен дека постои желба да се направи интервју со г-ѓата Јанева, сепак уредничката Аргирова сосема недоследно и без одобрение на Колегиумот на Првиот програмски сервис, на своја рака го продуцираше интервјуто и без консултација со Колегиумот го емитуваше истото, за потоа да следат лавина од реакции за тоа како било сработено? Се разбира и уредничкиот Колегиум на МТВ1 имше прашања кои сакаше да ги постави до обвинителката Катица Јанева, но завршеното инкогнито интервју не претече сите, надвор од нормалните и професионални принципи на работа (пријава на интервју на колегиум, план за реализација и продукција и емитување на истото). Овие работи повеќе и ги нема како реалност во МТВ, по преземањето на уредничкото место во Информативната програма. Ако ништо друго, очекувавме, барем консултација по однос на содржината и монтажата на истото. И повеќе од убедени сме дека така измонтираното и реализирано интервју не му е местото на ниедна телевизија. Но на желбите и нарачките им нема крај…Доколку, одговорниот уредник на МТВ1 или Колегиумот на Првиот програмски сервис беа директно инволвирани во реализацијата на интервјуто, за истото да изгледаше по сите стандарди и нормативи на професионално работење, сега немаше да дојдеме до ситуација никој да извинува на никого се вели меѓу другото во оваа реакција.