Баерн Минхен и Карло Анчелоти се разделија. Прекинот на соработката меѓу германскиот великан и трофејниот менаџер доаѓа по нецели 24 часа од убедливиот пораз на Баварците од екипата на ПСЖ со 3:0. Одлуката за раскинување на врската е донесена по состанокот меѓу клупската управа и Италијанецот по враќањето од Париз и објавена е на официјалната интернет страница на клубот од „Алијанц арена“.
„Играта на нашата екипа од почетокот на сезоната не е во рамки на очекувањата. Натпреварот во Париз даде јасна најава дека ќе има последици. Јас и спортскиот директор Хасан Салихамиџиќ отворено разговаравме со Карло денеска и притоа го известивме за нашата одлука. Она што го видовме не беше Баерн“, нагласи Карл Хакнц Румениге, претседател на Баерн, со чија одлука за Анчелоти се опфатени и асистентите Џовани Маури, Франческо Маури, Давиде Анчелоти и Мино Фулко.
Баварците во ланската сезона под водство на Анчелоти ја освоија титулата во Бундеслигата и стигнаа до четврт-финале во Лигата на шампиони, фаза во која беа елиминирани од Реал Мадрид.
„Благодарност до Карло за стореното во соработката. Жалам што ова се случи. Анчелоти е мој пријател и ќе остане пријател. Но, принудени сме на ваква професионална одлука во интерес на клубот. Очекувам позитивен развој во наредниот период и најдобри игри како би можеле до целите за оваа сезона“, продолжи еден од легендарните германски фудбалери.
Тројца кандидати, според германските медиуми, се опција за наследници на Анчелоти. Тоа се Вили Сањол, Јулијан Нагелсман и Томас Тухел.