На пет дена од референдумот на кој Шкотска ќе се изјасни дали сака независност, агенцијата за истражување ЈуГов покажа дека поддршката за независност опадна за три проценти соопштува Гардијан.
Последните резултати од анкетите покажаа дека 52 проценти од населението е со став Шкотска да остане дел од Велика Британија, додека 48 проценти сметаат дека државата треба да стане независна. Неизвесноста од резултатот го натера премиерот Дејвид Камерон да ја посети Шкотска на еднодневна кампања со цел да ги придобие гласовите на неопределените.
Во своите говори, Камерон се повика на емоциите и на значењето на сојузот Велика Британија кој постои веќе 307 години велејќи дека неговото срце ќе се скрши ако „оваа фамилија на нации“ се распадне.
„Понекогаш бидејќи станува збор за избор, бидејќи станува збор за гласање, сметам дека луѓето го чувствуваат тоа како да се општи избори со кои донесуваат одлуки за наредните пет години и ако не им се допадне на наредните избори тие ќе ја сменат својата одлука. Но, ова е сосема различно од таквите избори. Ова не е одлука за наредните пет години, ова е одлука за следниот век“, рече Камерон во својот говор пред луѓето во Единбург.
Блер Џенкинс од кампањата за независност изјави дека последните резултати не се за разочарување всушност тие се доказ дека двете кампањи не се разликуваат многу во процентите.
– Иако „не“ се врати на врвот, кампањата за независност се држи до своите успеси од август. Овие успеси најчесто се резултат на луѓе коишто преминале од „не“ кон „да“ или од неопредлените – објаснува Џенкинс.
Шкотскиот прв министер, Алекс Салмонд ги отфрли ветувањата за поголеми овластувања на државата кои беа ветени од Камерон нарекувајќи ги „апсолутна паника на Вестминистерската елита“.
„Многу луѓе овие напори на Камерон ќе ги видат како премногу мали и премногу доцна. Премногу мали бидејќи тие не нудат силен парламент зад кој граѓаните ќе можат да застанат, а независноста тоа го прави. Напорите се премногу мали бидејќи тие не нудат објаснување за тоа како можеме да се заштитиме од националните здравствени услуги и тие доаѓаат премногу доцна бидејќи се последен знак на очај“ рече Салмонд.
Анализите покажаа дека поддршка за независност најмногу имало во населението помеѓу 25-39 годишна возраст. Исто така, рејтингот на првиот министер Алекс Салмонд кој се залага за независност на Шкотска опаднал за 4 проценти односно од 24 проценти на 38. Спротивно е кај поранешниот премиер, Гордон Браун кој е од страната на лабуристите чиј рејтинг се искачил на 35 проценти.