Во недела Швајцарците излегуваат на гласање и на референдум ќе одлучат за ограничување на месечните плати во швајцарските компании – најголемата плата не може да биде 12 пати повисока од најниската плата внатре во компанијата.
Доколку референдумот биде успешен, месечните плати на водечките директори на некоја компанија не би смееле да бидат повисоки од годишната плата на најниско платените работници.
„Иницијативата 1:12“ ја покренаа швајцарските млади социјалисти според кои никој не би требало да заработи за само еден месец онолку колку неговиот колега би заработил за цела година.
Собирањето на 100 илјади потписи потребни за референдумот започнало уште есента 2009 година, а „Иницијативата 1:12“ успешно била регистрирана во април 2011 година. Земајќи во предвид дека парламентот и сојузната влада предложиле иницијативата да се одбие, расправата по овој предлог започнала дури по две години.
Дел компаниите најавија дека доколку успее референдумот ќе ја напуштат Швајцарија. Новартис, Нестле, ББст и СББ бараат од своите надзорни одбори писмено да се изјаснат дека, ако референдумот „Иницијатива 1:12“ добие позитивен исход, Швајцарија ќе биде непожелно место за бизнис.
Челникот на Швајцарската либерална радикална партија, Руенди Носер, изјавил дека „Швајцарија, една од најлибералните европски економии, ќе стане европска Северна Кореја“.
Иако противниците на оваа иницијатива располагаат со грото од парите за финансирање против кампања, исходот од референдумот е неизвесен.
Резултатите од истражувањето на јавното мислење ги загрижија сопствениците на компаниите, бидејќи поголем дел од населението го поддржува ограничувањето на највисоката плата.
Пет дена пред референдумот 44% од Швајцарците позитивно се изјасниле за “Иницијативата 1:12”, 44% се против, а останатите 22% биле неопределени.