Агенција Рејтинг седум години успешно ги прогнозираше сите избори до сега и во овој период успеавме да изградиме имиџ на професионална, точна и пред се непристрасна агенција која објективно го мери јавното мислење во Македонија, соопштува сопственикот Никола Спасов, на Фејсбук страната на оваа агенција.
Со последната прогноза за претседателските избори се покажа дека нашата методологија, која досега беше репер, потребно e да се корегира. Со корегирана методологија веќе спроведуваме ново истражување кое, како што најавивме, ќе ги прогнозира резултатите за вториот круг на претседателските избори и резултатите од парламентарните избори.
Но, покрај ова би сакал во мое име и во името на сите вработени во Рејтинг да ве уверам во една работа. Во ниеден момент, и со ниедна наша објава немавме намера да фаворизираме одреден кандидат или политика. Единствена цел, како и секогаш во минатото, беше да бидеме што поблиску до изборниот резултат. Не постои поголем успех за нас од тоа да бидеме релевантен извор на податоци за јавното мислење и сакаме да ве увериме дека и во иднина ќе го правиме истото.
Искрено се надевам дека ја зачувавме вашата доверба, а релевантноста на нашата работа и искрените намери ќе ги потврдиме веќе во следната прогноза за само неколку дена, вели
Никола Спасов.