-Не се чувствувам виновна, рече потпретседателката на Собранието Фросина Ременски која денеска даде исказ пред судија на претходна постапка откако вчера беше осомничена со проширената истрага за случајот „Рекет“.
Очекува Обвинителството да го докаже тоа што и го става на товар. Се додека не биде докажана вина со правосилно судско решение, вели, таа е невина.
-И кога давав исказ како лице од кое може да се добијат потребни информации во Обвинителството за организиран криминал реков дека не се чувствувам виновна, рече Ременски.
Таа рече дека нема да се повлече од функциите кои ги извршува.
Во врска со вчерашната изјава на премиерот Зоран Заев дека ако некое лице биде осомничено, обвинето или слично, ќе биде времено отстрането од партијата, Ременски истакна дека ќе ја почитува секоја одлука.
Во Судот денеска треба да се јават уште неколку лица осомничени во проширената постапка за овој случај.
Случајот од вчера доби нов тек откако истрагата се прошири на уште четири лица, за перење пари, измама и помагање во измама . Меѓу новоосомничените е и потпретседателката на Собранието Фросина Ременски, почесен претседател на Меѓународниот сојуз, потпретседателката на овој Сојуз Јасна Мандиќ, таткото на Бојан Јовановски, Миле Јовановски, Кристина Карајованова и Бојан Јовановски кој е осомничен за нови кривични дела.
Според Обвинителството Ременски го искористила својот авторитет за да изврши влијание. Обвинителката Русковска бара да и се одземе патната исправа и да се преземат мерки за обрзбедување.
Синоќа на потпретседателката на Меѓународниот сојуз Јасна Мандиќ.
Државниот јавен обвинител Љубомир Јовески кој вчера прв ја најави проширената истрага оцени дека предметот „Рекет“ не е целосно исцрпен и дека Обвинителството работи на утврдување факти и околности и за други две – три дејства. Јовевски и Русковска потврдија дека некои од осомничените биле заинтересирани за спогодба, но дека до овој момент конкретна спогодба со осомничените за случајот „Рекет“ не е постигната, ниту е влезено во посериозни договори околу спогодбата.
-Вештачењата кои беа направени последни донесоа важни докази. Имаше интерес кај некои од осомничените за спогодба, не се поднесе официјално барање, но побараа спогодба. Ќе видиме што ќе биде. Еден осомничен побара спогодба за обвинението кое ќе биде поднесено утре, рече Русковска.
Во „Рекет“ првоосомничен е Бојан Јовановски-Боки 13 за примање награда за противзаконско влијание и за перење пари и други приноси од казниво дело. Второосомничен, за трговија со влијание, е Зоран Милески-Кичеец, а поранешната специјална обвинителка Катица Јанева е третоосомничена за злоупотреба на службената положба и овластување.
Јовановски и Јанева се во притвор во КПУ Затвор Скопје, а Милевски е во домашен притвор.
Исказ во Обвинителството нема да дава ниту Катица Јанева. Нејзината адвокатка Ирена Фрчковска потврди дека таа во оваа фаза нема да дава исказ, но ќе го задржи правото во однос на предлагање сведоци и докази понатаму во постапката.