Министерот за финансии Зоран Ставрески не префрлил 12 милиони евра, пари кои само за месец март се неопходни за исплата на социјалните и останатите трансфери, обвинува министерката за труд и социјална политика, Фросина Ременски.
Ременски вели дека во Министерството за финансии скоро еден месец стојат на трезор нереализирани исплати кон граѓаните за породилно боледување, правата од социјална заштита, средства за здравствено осигурување и други социјални надоместоци.
-Во трезорот стојат неисплатени и средствата за заштитните друштва кои вработуваат инвалидизирани лица во висина од 64.402.617 денари, средства за здравствено осигурување 8.689.231 денар, средствата за бањите кои даваа услуги за бањско- климатска рекреација на пензионерите во висина од 10.755.522 денари, паричната помош за граѓаните за опожарени куќи или за лекување од висина од 240.000 денари и дурги, или вкупно неисплатени близу 12.000.000 евра.
Го повикувам министерот за финансии, Зоран Ставревски, веднаш да ја одблокира исплатата на неисплатените права на граѓаните и да престанат манипулациите со ранливите категории на граѓани на кои овие сретства, можеби им се единствени месечни примања, вели Ременски.
Таа го повика Ставрески веднаш да ја одблокира исплатата на социјалните и останатите надоместоци.
Од Министерството за финансии пак, велат дека тврдењата на Ременски се неточни и станува збор за „уште еден обид да се манипулира јавноста како дел од нечија политичка агенда.“