Согласно Законот за Влада кој што произлезе од договорот во Пржино и Законот за административни службеници сите министри и дополнителни заменици имаат право да ангажираат по тројца кабинетски советници од редот на Министерството и по тројца советници кои што ќе бидат ангажирани од министерот во форма која што е уредена со закон.
Мила Царовска е еден од тројцата кабинетски советници, постапката за нагажирање на уште двајца е во тек. Сакам да истакнам дека и Диме Спасов и министрите и замениците и од редот на опозицијата и од власта ги имаат истите права во ангажман на такви лица.
„Тоа што Диме Спасов не одлучува да ангажира кабинетски советници, тоа е прашање на кое тој треба да одговори, но тоа не значи дека тој има право да го спори ангажманот на кабинетските советници на министерот кое е дадено со закон. Ангажманот на Мила Царовска не е никакво противзаконско ангажирање, туку нешто што е дадено со закон“ вели во интервју за НОВА, министерката за труд и социјала Фросина Ременски.
Таа нагласи дека сака да ги демантира, како што рече, сите шпекулации на провладините медиуми дека невработено лице ги прегледува лични податоци на граѓаните, дека одговара на нивните прашања.
“Сето тоа е невистина бидејќи ангажирано лице кое одговара на прашања и поплаки на граѓани е Наташа Методиева вработена во Министерството која работи долги години таму и извршувала исти задачи додека Диме Спасов бил министер. Но, морам да нагласам дека се одговарало на прашања за упатување до одредени сектори или некои нивни дилеми и прашања. Она, што и укажав на Инспекцијата која беше во мојот кабинет, по анонимна претставка е дека од почетокот на годината досега во фиока биле затворени 1400 жалби од граѓани на кои им била укината социјалната помош “, рече во интервјуто Ременски, кое ќе го гледате денеска попладне во емисијата ПРОЦЕС.
Ременски одговара на многу други прашања, како ќе се справи со опструкциите, дали како министер од опозицијата е прифатена во Владата, зошто нема обезбедување кое и следува со Закон.
Дали сиромашните граѓани може да се надеваат на редовна социјална помош, ќе се ревидира ли работењето на Агенцијата за вработување која секојдневно отпишува граѓани од листата на невработени поради методологијата на задоцнување од еден ден. ПРОЦЕС е денеска во 16 часот.