Постои взаемна желба да се прошират политичката и економската соработка на Србија и Франција, заклучија денес францускиот министер за европски прашања Тјери Репентан и српскиот премиер Ивица Дачиќ. Франција сака Србија да стане 29-та членка на ЕУ, порача Репентан.
„Како избран министер за европски прашања на Франција, сакам да порачам дека желбата на Франција е Србија да стане 29-та членка на ЕУ“, изјави Репентан на конференција за новинари, пренесува РТС.
Дачиќ пак велејќи дека сака што побрзо неговата земја да започне со пристапните преговори, изрази надеж дека тие ќе бидат кратки и успешни.
„Ви препорачувам да се обложите на Србија“, изјави српскиот премиер.
Репентан и Дачиќ се согласиле дека Франција и Србија имаат исклучително добри политички односи и дека двете земји се залагаат за продлабочување на соработката во областите на економијата, одбраната, правдата, полицијата и културата.
Францускиот министер порача дека неговата земја ќе продолжи да ја подржува Србија во евроинтеграциските процеси. Со посетата на Белград тој ја почна балканската турнеја во рамките на која ќе ги посети и Црна Гора и Косово.