Според МВР досега официјално има 21 жртва од поплавата. Но, со оглед на фактот што шест лица се уште се водат за исчезнати, сосема е можно бројот на жртви да биде поголем.
Количеството од 93 милиметри кубни дожд на метар квадратен, или 30 милиони кубни метри вода вкупно на релативно мала површина во период од 18 до 24 часот, е доста ретка појава. Но не е појава чие повторување може да се отфрли со одмав на раката и да се верува дека тоа повеќе нема да се случи.
Во минатото имало и поголеми врнежи во Македонија и повторно ќе ги има, тврди за НОВА Ивица Милевски, професор на Институтот за географија.
Во минатото имало и поголеми врнежи во Македонија и повторно ќе ги има. Колку што е поразвиена државата, толку е помало значење на количеството на врнежите.
Во Гевгелија имало врнежи од 160 милиметри што е речиси двојно од количеството вода кое се истури врз скопските села. Милевски дава и други примери во регионот како во Варна, Бугарија каде се забележани врнежи од 140 милиметри или во Ријека, Хрватска каде паднале 230 милиметри вода.
“Колку што е поразвиена државата, толку е помало значење на количеството на врнежите”, вели Милевски. Оттука, треба да се работи на превенција на поплави и според него потребни се од 10 до 40 милиони евра за да се заштити Скопје.
“Не би имало проблем доколку има проточни канали кои водата би ја воделе до Вардар”, вели Милевски. И додава дека не е проблемот само во Скопје и неговата околина туку дека и многу други места во Македонија се во опасност.
Околу скопската обиколница Милевски вели дека не го познава проектот според кој овој пат е граден и дали се водело сметка да се обезбедат канали во кои шутот и другиот смет нема да ги затрупува и да прави еден вид брана низ која водата не може да се евакуира.
Сличен е и ставот на Живко Велјановски, универзитетски професор на Градежен факултет на катедрата за водовод и канализација.
Во изјава за „Фактор“ тој вели дека неговиот факултет барал ревизија на проектот за обиколницата:
“Баравме да се прифатат атмосферските води од над обиколницита, да не одат под патот и директно водите да се слеваат во Стајковци и инсистиравме да се обезбеди тие атмосферски води да не одат ниту над, ниту под патот, туку да се направи проект за да тие води се слеваат на безбедно, во Вардар”.
Политичките партии почнуваат да бараат одговорност за поплавата. Либералната партија вели дека “дождот е „виша сила“, но неисчистените одводни канали, недоволното инспектирање на патиштата и нивната дренажа, недоволното инвестирање во одводи и канализации во Скопје и скопската котлина, додека барок и стиропор го затрупаа Скопје – се дело на власта”.
Од партијата Беса велат дека имало предупредувања дека до ваква поплава може да дојде: “ова е доволна индикација за Јавниот обвинител на Република Македонија, да покрене истрага за идентификување на кривичната одговорност на правните лица, кои со својата пасивност дозволиле една ваква непогода”, вели Беса и ги цитира градоначалниците на Арачиново, Гази Баба, на Град Скопје (екс градоначалник на Гази Баба), министерот за Животна средина и просторно планирање, актуелниот и бившиот премиер.