Заменик министерот за правда Оливер Ристовски за СДК.мк изјави дека Министерството за правда ќе ја прекине процедурата за измена на Законот за референдум за да не се нанесе штета на преговорите со Грција, иако птенцира дека тие немаат никаква врска со тоа, туку е само „техничко усогласување со Изборниот законик и Законот за судови“.
-Ќе прекинеме со процедурата за измена на Законот за референдум, за да не се наштети на преговорите за името, иако тоа нема никаква врска“, вели Ристовски. „Се планираше само да се направи усогласување на Законот за референдум со Изборниот законик, бидејќи според Законот за референдум кој е порано донесен, приговори се поднесуваат до Врховниот суд, а според Изборниот законик приговори се поднесуваат до Управниот суд. Само се планираше да се испеглаат технички работи, суштината на Законот за референдум не се менува, вели Ристовски.
На страницата на ЕНЕР (Електронски национален регистер на прописи), утринава беше објавено дека се предвидува да се направат измени на Законот за референдум по скратена постапка. Предлогот е веќе повлечен.
Како што беше најавено, јавна расправа не беше предвидена, а временската рамка за предлог-законот беше најдоцна до 31 јануари.
Според Министерството за правда, се врши уредување на прашања кои се од значење за практичното спроведување на законот и техничко доуредување на законскиот текст.
Законот за референдум и други облици на непосредно изјаснување на граѓаните е донесен во септември 2005 година, a Изборниот Законик во март 2006 година, потестува Министерството.
– Во предложените измени на член 1, член 2, член 3 и член 4 од Законот за референдум и други облици на непосредно изјаснување на граѓаните се врши усогласување со Изборниот законик, наведува Министерството за правда.
Дополнува дека Изборниот законик е објавен на 31 март 2006 година и влезе во сила со денот на објавување во Службен весник. Со денот на објавување на Изборниот законик, пак, престанаа да важат Законот за избор на претседател на РМ, Законот за избор на пратеници во Собранието на РМ, Законот за локалните избори, Законот за избирачки список, Законот за избирачките места и Законот за изборните единици за избор на пратеници во Собранието на РМ.
Според Министерството за правда, со предложените измени во членот 5 и 6 од Законот за референдум и други облици на непосредно изјаснување на граѓаните се врши усогласување со Законот за судовите, објавен во мај 2006, а каде во членот 22 покрај постоечките судови се воведе Управниот суд. Членот 34 од Законот за судовите ја уредува надлежноста на Управниот суд. Имено, со Законот за судовите надлежноста за решавање на управните спорови од Врховен суд премина во Управниот суд.
Со Законот за референдум и други облици на непосредно изјаснување на граѓаните се уредуваат начинот и постапката за решавање и спроведување на референдум, покренување на граѓанска иницијатива, свикување и одржување на собир на граѓани, како и други прашања од значење за непосредно изјаснување на граѓаните.
Досега во историјата на Република Македонија се одржани два референдума на државно ниво, тој за независноста во 1991 и за територијалната организација во 2004 година.