Регулаторната комисија за енергетика на денешната седница ја одреди новата цена за парно греење . Таа останува непроменета, иако компаниите што им испорачуваат топлинска енергија на граѓаните предлагаа корекција односно покачување на цените.
Најголемата компанија која снабдува 56.000 потрошувачи, БЕГ ќе има намалување на цената за 4,35 проценти, ЕСМ Енергетика која снабдуваа 3.800 потрошувачи цената за топлинска енергија треба да ја намали за 0,57 проценти а Скопје Север која опслужува 501 потрошувач, ќе ја намали цената за 1,25 проценти.
„Имаме историски најниска цена за испорачана енергија. Стан од 55 до 60 квадрати, за цела година или една грејна сезона ќе плаќа 19.900 денари. Со тоа испраќаме порака до граѓаните кои не се приклучени да се приклучат на системот оти тоа е најевтин начин за загревање на домовите“, рече Марко Бислимовски, претседател на Регулаторната комисија за енергетика.
Трите компании во градот Скопје опслужуваат околу 60.000 потрошувачи кои се приклучени на нивните централни системи за греење. Статистиката вели дека за една година компаниите се стекнале со две илјади нови потрошувачи.