Регионалната неформална иницијатива „Новинарска мрежа“ најостро го осудува нападот на македонскиот парламент, во кој беа повредени повеќе од стотина луѓе, меѓу кои и неколку новинари. Нив насилниците, приврзаници на националистичкото ВМРО, револтирани од одлуката Талат Џафери да се именува за претседател на Собрание, ги означија како наклонети на социјалдемократите и албанското мнозинство и ги тепаа и ја уништија нивната опрема за работа, велат од „Новинарска мрежа“.
„Нашата колешка Искра Опетческа, новинарка на ТВ21, се здоби со сериозни повреди на главата, откако еден од демонстрантите кои влегоа во парламентот ја удри со столица во глава, бидејќи како што и рекол „работи за албанска телевизија“, пишува во реакцијата.
Освен неа, нападнати се и повредени главниот уредник на ТВ 21, Фатмир Алиу, кој исто така доби повреди на главата, потоа новинар на агенцијата „Мета“, кои насилниците го означија како близок со СДСМ.
Новинарката на Радио Слободна Европа, Зорана Гаџовска, беше жртва на напаѓачите во Собранието.
„Насилникот кој ја нападна и и ја скрши камерата идентификуван е како вработен во владината администрација“, посочуваат колегите од Новинарска мрежа.
Новинарската мрежа бара од македонските власти темелно да го истражи овој напад и да ги казни организаторите и тепачите, како и на колегите новинари да им се обезбеди сигурност во вршењето на работните задачи.
„Неприфатливо е полицијата да не го предвиди и спречи овој насилен упад, особено со оглед на тоа дека бројни демонстранти најавуваа пресметка на социјалните мрежи. Неприфатливо е од Македонија постојано да доаѓаат вести за напад на новинари, а тие да не доживеат адекватна реакција од државата, ефикасно полициско и судско процесуирање.Бараме адекватна реакција и од меѓународната заедница и меѓународните организации“.