Група родители од различни скопски средни училишта попладнево одржаа заедничка информативна средба на влезот од гимназијата „Јосип Броз Тито“. Заедно со претставници на средношколците, Народниот Правобранител и Хелсиншкиот Комитет, родителите уште еднаш од прва рака слушнаа за сите законски права и обврски од аспект на образованието на средошколците, а дел од присутните пред медиумите изјавија дека целосно застануваат зад барањата на нивните деца.
-Децата одлично ја водат својата борба, не само што имаме целосна доверба, туку и се восхитуваме на начинот што се секогаш три чекори пред нас и кога сакаме да ги советуваме нешто. Сега веќе МОН како да најави престанок на преговорите со незавршена работа. Да се уважат аргументите на децата, да не се тера инает дека тие рекле вака, а ние вака сме рекле, па сеа ние сме попуштиле до некаде па тие да попуштат, туку навистина да се работи за најдобриот интерес на децата. Ние од самиот почеток на екстерното тестирање увидовме голем број слабости, на наша срамота оди тоа што ние родителите не реагиравме,а чекавме децата да реагираат, сега просто не можеме а да не ги поддржиме нивните аргументи, не само што се наши деца, туку се и во право, изјави еден од присутните родители.
Родителите одлучија да се здружат и во неформалниот Родителски Пленум, а дел од нив и дежураат во смени во кампот на МОН каде средношколците веќе втора недела спијат под отворено небо и еден месец ја бојкотираат формалната настава во училиштата.
Според нив, нелогично е децата да ја изгубат годината, бидејќи најголем дел од онеи кои бојкотираат се одлични ученици, а наставата не се одвива во најголемите скопски гимназии.
-Ние таа варијанта ја исклучуваме, бидејќи нема логика, бројот на децата кој ја бојкотираат наставата е прилично голем. Ништо не е исклучено, јас не сум правник да знам дали да изгубат година, меѓутоа мене ми изгледа нелогично, повеќемина од тие ученици што се во кампот се одлични ученици годината, значи ние веројатно би биле единствена држава во светот каде одлични ученици би ја повторувале годината, така да се надевам дека ќе најдеме заеднички решенија, рече еден од родителите.
Минатата недела Владата одлучи само оваа година матура да се полага по стариот концепт, односно во писмена форма, а математика да биде изборен предмет и надлежните ги повикаа средношколците да се вратата во училишните клупи.
Наспроти ова, средношколците бараат во текот на наредните 4 години да се полага стариот концепт на државна матура, а за тоа време работните групи да го усовршуваат новиот модел кој би се применил за следните генерации. Нивното второ барање е екстерното тестирање да биде анонимно и оценката да не фигурира никаде во свидетелствата, но Владата го одби и ова барање.
Од Средношколскиот Пленум преку соопштение порачаа дека нема да го напуштат кампувањето во паркот наспроти министерството за образование, се до целосно исполнување на нивните барања. Пленумци упатија апел и до сите граѓани кои се воможност да им помогнат во нивната битка, преку поддршка со присуство во паркот, но и преку донации со храна.