Излегле во центарот на Скопје да прошетаат и наишле на хулигани кои ги претепале. Вака таткото на 14 годишното дете од Батинци кое во неделата навечер беше претепано на плоштад „Македонија“ раскажува за настанот во кој освен неговиот син, физички нападнат бил и неговиот внук, а со полесни повреди поминале уште неколку нивни другари.
Деветнаесетгодишниот Бурхан Исмаил најмногу се здобил со повреди во глава, додека на неговиот помал братучед искршена му е раката. И двајцата братучеди завршиле во болница и велат дека уште се опоравуваат од шокот кој го доживеале во центарот на градот.
-Децата излегоа да прошетаат и наишле на група која ги удирале со флаши и шипки… велат дека биле 20 луѓе, а позади нив доаѓала уште поголема група. Биле маскирани. Барам надлежните што поскоро да ги најдат напаѓачите, вели за НОВА родител на едно од нападнатите момчиња.
Настанот се случил веднаш по фудбалскиот меч меѓу Вардар и Скупи во неделата, а дел од медиумите објавија дека нападот е дело на навивачката група „Комити“. Навивачите преку соопштение негираа дека се инволвирани и тврдат дека инцидентот на плоштадот нема врска со нив.
Неколку дена подоцна пак, момчиња од македонска националност биле нападнати кај трговскиот центар Мавровка. Нив успеал да ги спаси случаен таксист, кој ги разбркал хулиганите и ги пренел момчињата со сериозни повреди во болница.
„Беше облеан во крв во лицето, со неколку повреди во пределот на главата. Беше свесен. Првин на интензивна потоа во шок соба. Очекуваме попладнево да биде пуштен дома“, објаснуваше мајката на едно од нападнатите момчиња вчера во изјава за Телма.
Родителите стравуваат дека нивните деца не се безбедни во градот и апелираат надлежните да ги преземат сите неопходни мерки на безбедност. На полицијата оставаат и да разјасни дали има некаква поврзаност помеѓу инцидентите.
Од МВР за НОВА велат дека интензивно работат за наоѓање на сторителите. Според нивните досегашни информации, нема поврзаност на двата инцидента, а не се знае ниту мотивот зошто децата се претепани.