Иран не престставува апсолутно никаква закана за светот, изјави иранскиот претседател Хасан Рохани. Во неговиот говор пред Генералното собрание на ОН, претседателот Рохани ги осуди санкциите за неговата земја поради развојот на нуклеарната програма.
Тој го повика американскиот претседател Барак Обама да ги игнорира повиците за војна и да се определи за преговори.
„Доколку САД одбијат да ги следат краткорочните интереси на про-воените групи, можеме да најдеме простор за надминување на нашите разлики“, вели Рохани.
Според него, Иран ќе се однесува одговорно во однос на регионалната и меѓународната сигурност.
Ова е негово прво меѓународно излагање по изборите на 14 јуни. Во Иран тој се смета за умерен политичар, но правата власт во земјата, и контролата за најважните државни прашања, вклучувајќи ја и нуклеарната програма, ја држи врховниот лидер Али Хамнеи.
„Нуклеарното оружје и другите оружја за масовно уништување немаат место во доктрината на одбраната на Иран и се во спротивност со нашите основни религиозни и етички убедувања“, изјави иранскиот претседател.
Тој истакна дека Иран ќе го брани мирот врз основа на демократијата и изборите насекаде во светот, вклучувајќи ја и Сирија, Бахреин и други земји во регионот.