Романија конечно ја уклучи машината која треба оваа земја да ја ослободи од корупцијата која со години ја «јаде» економијата, социјалата и севкупниот развој на земјата. Од средината на јануари државната служба за борба против корупцијата (ДНА) влезе во битка со сите кои ја осиромашуваат и крадат земјата.
Секојдневно се апси. Акцијата почна со апсење на поранешниот министер за економија која е осомничен за злоупотреба на власта, потоа познат газда на медиуми осомничен за даночно затајување, судија на Уставниот суд осомничен за корупција, првиот човек на обвинителството осомничен за организиран криминал…. Сите тие се веќе во притвор заедно со бизнисмени и други судии и чекаат судења.
Истрагата на ДНА почива на снимките на тајната служба на високи политичари.
Некои се веќе осудени како еден судија на 22 години затвор за судски одлуки кои тој ги фалсификувал, пет години за двајца министри за процесот на приватизација и уште десетина поранешни министри. Списокот е долг, велат медиумите. На него се наоѓа и поранешната министерка за информации која признава дека му платила 5 милиони евра на шефот на Демократската партија за да биде именувана за министер.
Уапсена е и Елена Удреа, блиска до поранешниот претседател Трајан Басеску која ја нарекуваат «блондинката на претседателот». Таа беше министе за туризам и кандидат за претседател и потоа пратеник.
Елена Удреа
Службата за борба против корупција (ДНА) води истраги за мајката, сестрата и Јулијан Хертану, зетот на премиерот Виктор Понта.
Јулијан Хертану, зетот на премиерот Виктор Понта
«Романија е на добар пат и мора да остане на тој пат», изјави потпредседателот на Европската комисија (ЕК) Франс Тимерманс додавајќи дека борбата против корупцијата е најголемиот предизвик и приоритет.
Кога Романија стана членка на ЕУ во 2007 година, ЕК воведе посебен механизам за Романија и Бугарија со кој Брисел ја следеше борбата против корупцијата. Лошите оценки за Романија ја спречуваа земјата за стане дел од Шенген зоната.
Во текот на 2014 година 1.138 јавни личности (политичари, бизнисмени, судии и обвинители) беа осомничени од страната на ДНА. Оваа акција ја води Лаура Ковеси.
Лаура Ковеси
Аналитичарката Алина Мунџиу-Пипиди од Романската општествена академија за Би-Би-Си вели дека во три години двете големи партии – демократската либерална партија и социјалдемократите – загубија на избори. Како резултат на она што таа го нарекува «меѓупартиска мафија» која ја водеше земјата со контрола на сите јавни набавки со огромни суми пари од ЕУ, кои кријеа данот и ги купуваа судиите и обвинителите во текот на долги 25 години. «Досега, истрагите во Романија беа селективни. Не повеќе”, вели Мунџиу-Пипиди.
Но таа ја подвлекува големата улога што во овој процес ја игра новиот претседател на земјата Клаус Јоханис кој беше избран во ноември 2014 година. Тој е политички аутсајдер и не е потписник на ниту еден од тајните договори помеѓу двете големи партии кои ја нагризуваа земјата.
Така, Моника Риџи, 37 години, поранешен министер за спорт и млади, беше осудена на 5 години затвор за злоупотреба на функцијата со трошење на 800 илјади долари од државните фондови за организирање на концерти за младите со ниски цени преку нејзините омилени фирми. Потоа парите од концертите биле делени помеѓу неа и партијата.
Со напукнувањето на мафијашкиот ланец почнаа и меѓусебни обвинувања помеѓу сите кои се дел од него. Така, Елена Удреа на еден сајт го обвини шефот на тајните служби дека барал 500.000 евра од нејзиниот сопруг за финансирање на една приватна телевизија. Откако е обинета, Удреа отркива детали за политичари, судии, бизнисмени. Аналитичарите тврдат дека ова е само почеток на демаскирањето на сите криминали на сите досегашни власти.