Главната обвинителка во Националниот директорат за антикорупција во Република Романија, Лаура Кодрута Ковеси денеска беше во посета на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, каде се сретнала и разговарала со специјалната јавна обвинителка Катица Јанева.
На средбата, како што се наведува во соопштението од СЈО, било разговарано за повеќе теми од интерес на работењето на ова Јавно обвинителство, а воедно биле разменети искуства од аспект на соочување со предизвиците во борбата против корупцијата на високо ниво и потешкотиите со кои се соочуваат институциите при ваквата борба.
Средбата со Јанева е во рамките на посетата на Кодрута Ковеси на земјава. Таа денеска се сретна и со јавниот обвинител Марко Зврлевски.
Како што сопштија од Јавното обвинителство, двајцата соговорници заклучиле дека местото на Националниот директорат за антикорупција во системот на Република Романија соодветствува со организациската поставеност на Основното јавно обвинителство за гонење на организиран криминал и корупција.
Романската обвинителка Лаура Кодрута Ковеси стана позната со истрагите со кои еден експремиер е в затвор, а на друг му се суди за корупција. Утре ќе учествува на конференцијата на тема „Ефективна борба против корупцијата на високо ниво: прашање на личност или на систем?“, дел од програмата за антикорупција на американската владина агенција за странска помош УСАИД што ја спроведува Македонскиот центар за меѓународна соработка (МЦМС).
Ковеси, која минатиот месец доби уште еден тригодишен мандат на чело на ДНА, ќе говори и за успешните примери за процесирање истраги за корупција на високо ниво во Романија. Во нејзиниот прв тригодишен мандат таа покрена истраги против илјадници високи функционери, од кои еден експремиер, Адијан Настасе заврши в затвор. Таа лани покрена истрага и против премиерот Виктор Понта додека тој сѐ уште беше на функција и даде налог за замрзнување на неговиот имот, по што беше покренато обвинение.