Партијата за целосна еманципација на Ромите вчера на протест пред МВР побара да престане дискриминацијата врз Ромите и враќањата од границите. Лидерот на ПЦЕР Самка Ибраимоски и порача на министерката Гордана Јанкулоска дека нејзините денови биле одброени.
– Се наоѓаме пред местото каде што изминативе два месеци низ проектот на најголемата опозициска партија СДСМ „Вистината за Македонија“ имавме можност да слушнеме како во оваа зграда на МВР- ДПМНЕ служела и како партиски штаб, но и место каде што се местат неистомислениците на власта. Имавме можност и на протестот пред владата да слушнеме како првиот човек на ова министерството, Јанкулоска, речиси при секој разговор кој беше поврзан со изборниот процес, Ромите од цела Македонија ги нарекуваше со погрдни зборови, а најомилен и е „Циган“. Дојдовме да и кажеме на Гордана Јанкулоска дека ние Ромите од Република Македонија можеби сме најсиромашните, најдискриминираните, најпонижените, но, сепак, сме достоинствени граѓани со чист образ, рече Ибраимоски.
Тој пред присутните рече дека денес Македонија за Ромите е робовладетеско општество каде што тие се третирани како модерни робови кои треба да служат како дел од гласачката машинерија на власт.
Ибраимоски напомена дека доколку уште еден Ром се пожали дека бил вратен од граница нивниот следен екор ќе биде поставување шатори пред граничниот премин Табановце.