Невладините организации на Ромите упатија отворено писмо до премиерот Зоран Заев во кое бараат “Ромите директно да учествуваат во одлучувачките процеси и да придонесуваат во развојот на демократијата”. Тие се загрижени и разочарани поради тоа што меѓу предложените заменици-министри нема ниту еден припадник на ромската заедница.
„Здруженијата на граѓани и активисти поддржувачи на оваа реакција го изразуваат своето незадоволство и разочарување од одлуката на премиерот Зоран Заев за распределба на заменици министри, бидејќи помеѓу именуваните заменици министри не е предложен ниту еден припадник на ромската заедница”, вели писмото.
Ромите го потсетуваат Заев дека добил силна поддршка од ромската заедница на изборите а за возврат добиле само еден министер без ресор што кај нив “креира чувство дека состојбата на Ромите во Република Македонија се уназадува односно влошува”. И предупредуваат дека СДСМ би можел да ги загуби гласовите на Ромите на локалните избори.
“Бараме претседателот на новата Влада да ја преиспита својата одлука по однос на распределбата на функциите во државата. Се надеваме дека во предвидените планови за инклузија на Ромите во општеството и во јавните институции, се предвидува назначување на Роми/ки на раководни функции во државните институции кои се од витално значење за унапредување на положбата на Ромите во Република Македонија. Очекуваме дека и нашите претставници во извршната власт и законодавна власт – Пратеникот Курто Дудуш и Министерот без ресор Самка Ибраимовски да реагираат на ваквата одлука и јавно да ги застапат интересите на Ромите пред институциите”, вели писмото.
На последните избори околу 70 отсто Роми гласале за СДСМ и ПЦЕР, партијата на Ромите.
Здруженијата на Ромите бараат средба и со ромските претставници во власта. Од премиерот Заев и од министерот Самка Ибраимовски и пратеникот Курто Дудуш очекуваат “да ја образложат својата одлука за не-именување на Ром како заменик министер”.
Мартин Демировски, потписник на писмото, интелектуалец и активист за правата на Ромите вели дека ромската заедница низ цела Европа бара да се почитуваат правата на Ромите и да се применат декларативните изјави на политичарите:
“Македонија е земја која во минатото беше лидер за вклученост на Ромите. Првиот ромски пратеник во Европа беше Абди Фаик кој беше во коалиција со СДСМ, градоначалникот и министер Неждет Мустафа Ром доаѓаа од Македонија. И земјата се гордееше со нив и на сите европски средби се китеше со тој гест на еднаква вклученост на Ромите во политиката и власта. Ова писмо е повик да се овозможи континуитет на добрите политики на претходните влади. СДСМ по својата идеологија е про-малцинска партија па така сега треба да овозможат реализација на ова барање на ромската заедница. Со вклученоста на Ромите во новата Влада, Македонија може да смета на докажани експерти од областа на ЕУ интеграција, меѓународни односи, дипломатија, човекови права, застапување на работи што се битни за надворешниот имиџ на државата. Во ромската заедница има и добри познавачи на културата, здравството, социјалните права или економијата. Ромите се подготвени да и помогнат на државата а прашање е колку СДСМ и коалицијата ќе докажат дека имаат реформски и прогресивни размислувања за делување”, вели Демировски.
Писмото носи потписи на 79 интелектуалци или активисти а нивниот број се зголемува.