Екипите попладнево успеале да пробијат до 34-те рудари коишто беа заглавени во рудникот за јаглен во Зеница по што биле извлечени откако во четвртокот останаа затрупани. Спасени се 29 рудари, а пет не преживеаа.
Претседателот на Синдикатот за рударите во Босна и Херцеговина, Синан Хусиќ за новинарите изјави дека за ова знаел од претходно, но немал храброст да ја соопшти веста. За причината на смртта ќе се соопшти кога ќе бидат пронајдени мртвите тела.
Акцијата за спасување стана потешка при потрес што предизвика рушење на делови од јамата и ја оневозможи пристапноста до ходникот.
„Ние сме навикнати на ова. Ние од ова го заработуваме лебот и понатаму ќе продолжиме да работиме во рудникот. Тоа е сè што имам да кажам“, вели еден од рударите коишто беа спасени во акцијата.
Директорот на рудникот, Есад Чивиќ, рече дека и покрај несреќата не планира да го затвори рудникот.
„Не можеме да размислуваме за затворање на рудникот, туку само за отворање на некои други посигурни локации внатре во јамата. Ваквите потреси ниту можат да се предвидат ниту да се спречат“, рече Чивиќ.
Потресот бил со пет степени од Меркалиевата скала со длабочина од два километра. Оваа јама се смета за доста опасна поради фактот што во неа се развива гасот метан.