Доколку ескалира полнправна војна, војската на Украина би била потисната од северниот сосед. Според „Europa World“, во 2012 година, активната руска војска броела 845.000 против 130.000 на Украина.
Буџетот за одбрана на Русија во 2012, бил огромен, 78 милијарди долари во однос на украинскиот, 1.6 милијарди.
Според напис објавен во 2011 година во кој анализира еден воен експерт, тој потенцирал дека Украина би се нашла една деценија во „дефанзивен вакуум“ доколку инвестициите во војската не бидат променети.
„Нулто ниво на прогрес“, вели Валентин Бадрак, експерт во сферата на националната безбедност и одбрана, за „Nezavisimaya Gazeta“ весникот.
Како што е истакнато во студија од 2010 година, Владата тврдела дека нема потреба за голема војска, бидејќи најголемите закани за Украина не доаѓале однадвор туку од внатрешната политичка дестабилизација.
Според статистиката на ЦИА, Украина има 15.7 милиони мажи и жени на возраст од 16 до 49 години, подготвени за служба во војската. За разлика од Украина, Русија има 45.6 милиони речиси на иста возраст. Токму овие бројки, можеби беа во главата на актуелниот министер за одбрана на Украина, Ихор Тенју во неделата, откако во затворена сесија во Парламентот, изјавил дека неговата земја нема доволно војска да и се спротистави на Русија.
Според изворите кои го пренесоа неговото обраќање, Тенју повикал на дипломатско решавање на кризата со Русија.
Инаку, во денешното соопштение што го издаде Белата куќа, во име на сите лидери на Г7, како и на претседателите на Европскиот совет и на Европската комисија се наведува дека акцијата на Москва е јасно кршење на принципите и вредностите врз кои оперираат Групата 7 и Групата 8.
Во меѓувреме, заменикот на украинскиот премиер, Виталиј Јарем, најави дека границата помеѓу Украина и Русија би можела да се затвори во блиска иднина, откако руските трупи во текот на изминатата ноќ заземале украинска воена едини и воспоставиле контрола врз еден од аеродромите во Крим.