Русија го избрка американскиот новинар и автор Дејвид Сатер, поранешен дописник на „Financial Times“ од Москва, и критичар на рускиот претседател Владимир Путин, соопшти самиот Сатер на Твитер.
Сатер работеше како известувач за Радио Слободна Европа и Радио Слобода од септември.
„Како што можеби знаете, протеран сум од Русија“, напиша тој на својот Твитер профил вчера.
Сатер за „CNN“ изјави дека заминал во главниот град на Украина за да ја замени постоечката виза со дописничка, по што бил одбиен врз основа на тоа дека неговото присуство во Русија било „непожелно“. Новинарот сега се наоѓа во Лондон чекајќи на одговор.
Сатер на големи пишуваше за историјата на Русија во пост-Советската ера.
Во декември, по загинувањето на 30 луѓе во Волгоград, тој напиша дека „туристите кои влегуваат во Сочи за Зимските олимписки игри ефективно влегуваат и во воена зона“.
– Секогаш сум бил критичен кон режимот на Путин. Тоа не е ништо ново. Можеби поради причини познати само за нив, тие конечно мојата критика ја сфатиле за доволна. Но всушност има многу за што да се критикува, така да ако известувате од Русија, речиси морате да бидете критичен, објаснува Американецот.
Според Сатер, зборовите со кои бил одбиен за виза наликувале на ерата на Студената војна. „Во секој случај, протерувањето на еден дописник има ефект врз сите, бидејќи дава до знаење дека критчки настроеното известување може да предизвика сериозни трошоци“, вели тој.