Додека Америка ги чека првите примероци на заживеаниот „Хамер“ под брендот на „ГМЦ“, Русија ќе добие нов робустен теренец кој изгледа како мешавина од „Хамер Х1“, „Х2“ и слични возила.
„Рускиот хамер“ се вика „Стрела“ (Ароу) и ќе биде наменет, пред сѐ, за државните служби на редот и законот, но и за домашниот потрошувачки пазар. Засега се знае оти возилото е долго 5,1 метри, широко 2,35 метри, тежи 3.500 килограми, има носивост до 900 кг. и капацитет за пет лица.
Се напојува со 2,8-литарски „Каминс“, дизел-мотор којшто развива 157 коњски сили и поврзан е со шестстепен рачен менувач. Моќта се пренесува на сите четири тркала, додека максималната брзина е 120 км./ч.
Прототипот има подвижен заден покрив, а неговите создавачи размислуваат и за цела серија слични возила, вклучувајќи и теренец со фиксен покрив, верзија со седум седишта и камион.