Обвинителката за гонење на организиран криминал и корупција Вилма Русковска ја заврши истрагата за „Рекет“ и за ова веќе го известила Бојан Јовановски – Боки 13 првоосмоничениот за Рекет, кој денеска беше во Обвинителството да даде исказ.
Адвокатот на Бојан Јовановски, Сашо Дуковски рече дека е преседан осомничениот да се повика да даде исказ истиот ден кога е завршена истрагата, иако тој претходно ниту еднаш не бил известен за доказите, ниту повикан да даде свој исказ.
„Европскиот суд за човекови права во Стразбур бара осомничениот веднаш да биде запознаен со основите на сомневање и со доказите. Но и покрај ваквиот преседан,ние нема да се браниме со молчење. Во овие 15 дена ќе ги видиме доказите и иако е истрагата завршена, ќе се договориме Бојан Јовановски да даде исказ“ рече Дуковски.
Дуковски наведе дека здравјето на Боки 13 е сериозно нарушено. Тој имал една операција за намалување на желудник, а потоа уште две неуспешни операции.
„ Постојано повраќа. Го носат во амбуланта му даваат една обична инфузија и со тоа се завршува. Реално не му е добра здравствената состојба. Ние сме позната нација – секој на секого му се сити. На социјалните мрежи пишуваат дека можеби е труден, а реално не му е добро“ рече Дуковски.
Во врска со изјавта на Дуковски дека се случил преседан за време на исказот на Боки 13 кога му бил доставено решение за завршена истрага, од обвинителството преку соопштение објаснуваат дека „давањето исказ на осомничено лице не е процесно дејствие, што подразбира дека одбрана, односно исказ, може да се даде и во законскиот утврдениот рок кога се врши увид во доказите“ и најавија дека од денес тече рокот од 15 дена за увид во доказите за првоосомничените лица и правото на одбраната да предлага докази во корист на осомничените.
Утре во Обвинителството за гонење на организиран криминал е повикана и Катица Јанева која е во притвор повеќе од 30 дена.
Откога е отворена истрагата, Русковска на распит повика повеќе бизнисмени, лица кои имаа функции во Меѓународниот сојуз на Боки 13 , обвинители во СЈО, политичари. Паралелно со случајот Рекет за кој се осомничени Бојан Јовановски, Зоран Милевски и Катица Јанева,(кои се осомничени дека зеле милион и пол евра од Камчев за ослободување од кривична одговорност во истрагата за „Империја“) во Обвинителството се води истрага и за парите кои бизнисмени ги уплаќале на Меѓународниот сојуз.