Според известувањата во Бразил, Националната Агенција за безбедност на САД директно ги таргетирала комуникациите на претседателите на Бразил и Мексико, со што односите помеѓу САД и двете најголеми економии во Латинска Америка се во опасност да се влошат.
Написите го цитираат Глен Гринволд, новинарот кој ги објавуваше документите добиени од протекувачот на информации на НСА, Едвард Сноуден.
Еден од наводните документи за НСА кој ги добил Гринволд датираат од јуни 2012, еден месец пред да биде избран мексиканскиот претседател Енрике Пена Нието. Во документот, кандидатот зборува околу тоа кој би работел во Кабинетот доколку биде избран.
Документите не се однесуваат на некои специфични комуникации на претседателката на Бразил, Дилма Русеф, но ги покажуваат методите кои НСА наводно ги користела да ги следи електронските пошти и комуникациите преку мобилните телефони со блиски соработници.
„Јасно се гледа во документите дека тие веќе ги извршиле шпионирањата“, изјави Гринволд за ноќната програма „Фантастико“ на телевизијата „Глобо“. „Тие не зборуваат за нешто што планираат, туку слават за успехот“.
Во однос на тоа, бразилските власти побараа одговор од американскиот амбасадор Томас Шенон.
Бразилскиот министер за правда, Едуардо Кардозо за „Си Би Ен“ изјави: „Ако тоа е потврдено работата е многу сериозна, бидејќи земјата не може пасивно да го прифати кршењето на нејзиниот суверенитет“.
Според Кардозо, секоја земја на која и е прекршен суверенитетот, мора да реагира, да заземе став и да го употреби меѓународното право да ги среди работите.
Мексиканските власти засега не реагираат, а нема никакви изјави ни од Белата куќа.
Претседателката на Бразил, Русеф треба да се сретне со американскиот претседател Барак Обама во Вашингтон во октомври.