Повеќе американски сенатори го повикаа претседателот Барак Обама, кој вчера се врати од 17-дневниот божикен одмор на Хаваите, да реагира по веста дека исламисти поврзани со Ал Каеда го преземале градот Фалуџа во западен Ирак.
– Иако Ирачаните се одговорни за оваа стратегиска катастрофа, и нашата администрација не може да избегне дел од вината. Кога претседателот Барак Обама ги повлече сите американски сили од Ирак, спротивно на мислењето на военото раководство и офицерите на теренот, многумина предвидувавме дека вакуумот ќе биде исполнет од страна на непријателите на Америка и тоа на штета на нашите национални интереси. За жал, тоа и се случи, изјавија сенаторите Џон Меккејн и Линдзи Греем во заедничка порака упатена до претседателот.
Од петокот, групи поврзани со Ал Каеда го држат овој голем град во централен Ирак и ги развеаја црните исламистички знамиња над центарот на градот. Ирачката армија се обидува да ја преземе Фалуџа од исламистите, но засега главно ги гранатира нивните позиции со минофрлачи.
Белата куќа соопшти дека работи заедно со ирачките власти во обид да го врати градот под контрола на Багдад, јави дописникот на МИА од Вашингтон.
– Загрижени сме од напорите на терористичката Ал Каеда и Исламската држава на Ирак и Левантот да ја прошират својата контрола врз Сирија и Ирак. Нивниот варваризам против цивилите во Рамади и Фалуџа и против ирачките безбедносни сили е видлив за сите, изјави Мари Харф, портпаролка на Стејт департментот.
Иако САД веќе не се воено ангажирани во Ирак, губењето на Фалуџа од страна на ирачката армија е исклучително болен удар за САД. Неколку кампањи на претседателот Џорџ В. Буш за сузбивање на сунитските исламистички групи во Ирак беа насочени токму во овој град.
Во 2004 година исламистите кои дејствуваа од Фалуџа киднапираа и убија четворица Американци вработени во приватната компанија за обезбедување „Блеквотер“, потоа влечејќи ги нивните тела по улиците на градот и бесејќи ги од мост. Во неколку тешки воени операции, во кои САД загубија стотина борци, наспроти неколку стотици убиени исламисти и над 1.000 цивили, градот од 300.000 жители беше ставен под контрола, но дури откако американската и ирачката војска привремено целосно го раселија. Оттаму, веста дека Фалуџа повторно е во рацете на исламисти силно одекна во САД.
– Илјадници храбри Американци се бореа, крвареа и загубија соборци за да им донесат мир на Фалуџа и на Ирак, и сега останува да се прашуваме дали нивните жртви беа залудни, пишува во писмото на сенаторите Меккејн и Греем.