САД се противи на враќање на воведување на вонредна состојба во Египет, изјави државниот секретар на САД, Кери, како што јавува Си-Ен-Ен.
Ова се смета за најлош ден после револуцијата во Каиро- 149 луѓе загинаа, според државната телевизија, додека Муслиманското братство известува за многу повеќе жртви.
Мохамед ел Барадеј поднесе оставка како потпретседател за надворешни работи, јави државната телевизија Нил.
Пораката до муслиманскиот свет е “куршумите се подобри од гласачките ливчиња”, вака се жалат поддржувачите на Морси.
Денеска Скај њуз снимателoт Мик Дин беше застрелан и убиен во Египет, како што јави телевизијата.
Мик, 61, има работено за Скај 15 години, со седиште во Вашингтон, а потоа Ерусалим.
Генералниот секретар на ОН Бан Ки-мун апелираше денеска за максимална воздржаност по најновиот развој на случувањата во Египет.
На Твитер неговиот портпарол напиша дека Бан е вознемирен од она што се случува во Каиро и повторно апелирал за воздржаност.
Европската унија е силно вознемирена поради информациите дека во денешната полициската операција во Каиро се убиени демонстранти, изјави портпаролот на високиот претставник на ЕУ за надворешна и безбедносна политика, Мајкл Ман.
Што се однесува до македонските граѓани во Египет, ниту еден граѓанин досега не се обратил за помош во македонската амбасада во Египет, откако од утринава започнаа крворолевањата и хаосот во оваа земја, информираа за НОВА во МНР.
Во Министерството немаат податоци дали во моментот таму престојуваат македонски граѓани, особено што секој престој подолг од три месеци се пријавува и евидентира во конзуларниот оддел, велат во одделението за односи со јавноста.
Нема информации ниту дали во моментот таму престојуваат наши граѓани кои заминале во оваа земја во сопствена режија. Хорот на МНТ кој наредната недела требаше да патува таму, го откажа својот настап.
-Ние сме подготвени да им помогнеме на сите оние на кои им е потребна заштита, но искрено не веруваме дека во ваква ситуација наши граѓани престојуваат таму, велат за НОВА во оделението за односи со јавноста во МНР.
Од утринава, телефонските линии и интернет врските со македонската амбасада се многу отежнати. Сепак, од Министертвото велат дека успеале да стапат во контакт со амбасадорот Миле Манолев преку сателитска линија.
Манолев информирал дека амбасадата е безбедна, дека тој нормално ги извршува работите и засега нема потреба од негово повлекување. Манолев нагласил дека во Египет не е прогласена вонредна состојба, а опасноста е во регионот на двата кампа, каде што во текот на денот има големи немири и интервенција на полицијата.