Амбасадата на Кралството Холандија во Македонија ќе земе активно учество на годинешниот PLMA саем во Амстердам, како организатор на македонскиот павиљон, кој првпат се поставува на овој саем. На македонскиот павиљон во Амстердам ќе се претстават компаниите: Макпрогрес, Рудине, Виталиа, Конимекс, Магрони, Мултихем и Хина.
Саемот во Амстердам е најголемиот европски саем од овој тип и е одлична можност за поврзување меѓу производителите и трговците на производите под сопствена трговска марка. За македонските компании – учесници, PLMA саемот претставува можност за зголемување на шансите за извоз на пазарите во земјите на Бенелукс и пошироко.
Амбасадата на Кралството Холандија во Скопје го организираше македонскиот павиљон во соработка со Холандско–македонската стопанска комора во Македонија. Амбасадата ја обезбеди потребната логистичка и организациска поддршка, додека средствата за учество на македонските компании се обезбедени од холандската државна агенција – RVO.
Со цел зголемување на билатералната соработка и трговска размена меѓу Холандија и Македонија, Амбасадата ќе ги запознае заинтересираните холандски компании со условите за соработка со Македонија.
Саемот ќе се одржи на 19 и 20 мај 2015, а македонскиот штанд ќе биде лоциран во халата 8 на RAI центарот во Амстердам.